Qazaqstan Prezidenti Qasym-Jomart Toqaev Aqtóbe qalasynyń Indýstriialdy aimaǵynyń jumysymen tanysty, dep habarlaidy "Ult aqparat" Aqordaǵa silteme jasap.
Memleket basshysyna keramogranit pen keramikalyq plitkalar shyǵaratyn «Zerde-Keramika Aqtóbe» JShS zaýytynyń qurylysy jóninde málimet berildi. Atalǵan investitsiialyq jobanyń jalpy quny 9,2 milliard teńge.
Qazaqstan Prezidentine Indýstriialdyq-innovatsiialyq damý memlekettik baǵdarlamasynyń júzege asyrylýy, ónerkásiptiń jańǵyrtylýy, shaǵyn jáne orta biznestiń damýy týraly baiandaldy. Sondai-aq, Qasym-Jomart Toqaevqa oblystaǵy iri óndiris nysandary, sonyń ishinde munai óndiretin «SNPS-Aqtóbemunaigaz» aktsionerlik qoǵamynyń jáne jel elektri stantsiiasynyń qurylysymen ainalysatyn «ARM WIND» jaýapkershiligi shekteýli seriktestiginiń jumysy jóninde málimet berildi.
Qasym-Jomart Toqaev kompaniia basshylaryna arnalǵan sózinde eńbekkerlerdiń jalaqysyn jyl saiyn ósirý jáne satyp alynatyn taýarlar men kórsetiletin qyzmetterdegi Qazaqstannyń úlesin arttyrý qajettigin aitty. Memleket basshysy shaǵyn jáne orta biznesti damytý úshin iri kásiporyndardyń ainalasynda beldeý qurýdyń mańyzdylyǵyn atap ótti.
Sońynda Qazaqstan Prezidenti oblys basshylyǵyna óńirge investitsiia tartý boiynsha keshendi shara qabyldaýdy tapsyrdy.
Sondai-aq, Memleket basshysy «Green Capital Kazakhstan» jylyjai keshenine bardy.
Qazaqstan Prezidenti Aqtóbe oblysyna jumys sapary barysynda jylyna 3 myń tonna kókónis ósiretin «Green Capital Kazakhstan» JShS-niń jylyjai keshenin aralap kórdi.
Qasym-Jomart Toqaev kásiporynnyń shyǵaratyn ónimderin kórdi jáne jańa jumys oryndaryn ashyp, halyqtyń ál-aýqatyn arttyrý úshin osyndai investitsiialyq jobalardy iske qosýdyń mańyzdy ekenin atap ótti.
Sodan keiin Qazaqstan Prezidenti Aqtóbedegi «Qazhrom» TUK» aktsionerlik qoǵamynyń ferroqorytpa zaýytynda boldy.
Memleket basshysyna Qazaqstan metallýrgiiasy kóshbasshylarynyń biri sanalatyn zaýyttyń tehnologiialyq úderisi men óndiristik kórsetkishteri kórsetildi.
Qazaqstan Prezidentine «halyq baqylaýy» jobasy tanystyryldy. Bastama aiasynda múmkindigi shekteýli jandar óndiris ornynda qaýipsizdik tehnikasyń saqtalýy men eńbektiń qorǵalýyn qamtamasyz etýge atsalysady.
Memleket basshysy jobanyń áleýmettik mańyzyn atap ótip, onyń iske asyrylý nátijelerin joǵary baǵalady, sondai-aq, bul tájiribeni keńinen qoldanýdy tapsyrdy.
– Biz bul bastamany qoldaimyz. Óitkeni, óndiriste jaraqat alyp qalý qaýipi joǵary bolǵandyqtan, bundai jumys óte paidaly jáne qajet. Eńbekkerlerdi áleýmettik jaǵynan qyzyqtyratyn jobanyń mańyzy zor. Barshańyzǵa densaýlyq, baq-bereke tileimin, – dedi Qasym-Jomart Toqaev.
