Foto: Akorda.kz
Prezident Qasym-Jomart Toqaev Astanaǵa resmi saparmen kelgen AQSh-tyń Memlekettik hatshysy Entoni Blinkendi qabyldady, - dep habarlaidy "Ult aqparai" Aqorda saityna silteme jasap.
Memleket basshysy amerikalyq diplomatqa iltipat bildire otyryp, Qazaqstan men AQSh arasynda diplomatiialyq bailanys ornaǵan ýaqyttan beri ekijaqty jáne kópjaqty formatta ózara tiimdi is-áreketter jolǵa qoiylǵanyn atap ótti.
"Sizdiń saparyńyz strategiialyq yntymaqtastyqty nyǵaitýǵa tyń serpin berý turǵysynan óte mańyzdy. Qaýipsizdik, energetika, saýda jáne investitsiia sekildi mańyzdy strategiialyq salalardaǵy senimdi ári uzaqmerzimdi seriktestik qatynastarymyz óte jaqsy. Sondyqtan biz bul yntymaqtastyqty odan ári damytýǵa daiynbyz. Osy múmkindikti paidalana otyryp, Qurama Shtattardyń táýelsizdigimizdi, aýmaqtyq tutastyǵymyz ben egemendigimizdi turaqty túrde berik qoldap kele jatqany úshin rizashylyǵymdy bildirgim keledi", – dedi Prezident.
Memleket basshysy ekonomikalyq yntymaqtastyq jóninde aita kele, AQSh Qazaqstannyń 62 milliard dollardan astam investitsiia quiǵan eń iri investory ekenin atap ótti.
Qasym-Jomart Toqaev Ortalyq Aziia elderi men AQSh-tyń syrtqy saiasi vedomstvolary jetekshileri kezdesýiniń Astanada ótýi mańyzdy ekenin atap ótip, Qurama Shtattardyń S5+1 formatyndaǵy yntymaqtastyqty nyǵaitýǵa baǵyttalǵan kúsh-jigerin quptady.
Óz kezeginde AQSh-tyń Memlekettik hatshysy qonaqjailyq kórsetkeni úshin Qasym-Jomart Toqaevqa alǵys aityp, AQSh Prezidentiniń sálemin jetkizdi.
"30 jyldan astam ýaqyt ishinde qol jetkizgen eleýli tabystardy ekijaqty deńgeide damytý, seriktestigimizdi tereńdetý jáne nyǵaitý mańyzdy. Tek sońǵy jyldary biz osy baǵytta mańyzdy ári jańa jetistikterge qol jetkizdik. Bizdiń qarym-qatynastarymyz berik jáne bailanystarymyz kúsheie túsedi. Biz osy baǵyttan ainymaimyz. Sonymen qatar búgin Astanada Ortalyq Aziiadaǵy seriktesterdiń basyn qosqanyńyz úshin Sizge jáne Sizdiń ujymyńyzǵa alǵys aitamyz. Áriptesterimiz – syrtqy ister ministrlerimen birge aimaqty biriktirýge baǵyttalǵan berik ári tyǵyz qarym-qatynas jasaý, naqty máselelerge nazar aýdarý jónindegi jumystarǵa atsalysamyz dep úmittenemin. Bul Ortalyq Aziia halyqtary men Amerika Qurama Shtattaryna paidaly bolady dep oilaimyn. Biz eń joǵary deńgeide ózara is-áreket jasaýǵa niettimiz. Men osynda kelgenime jáne yntymaqtastyǵymyzdy nyǵaitýǵa óz úlesimdi qosqanyma óte qýanyshtymyn", – dedi Entoni Blinken.
Sonymen qatar Amerika diplomaty Qazaqstandaǵy saiasi jáne ekonomikalyq ózgeristerge joǵary baǵa berdi.
Kezdesý sońynda Qasym-Jomart Toqaev AQSh Prezidenti Djo Baidenge júrekjardy sálemin joldady.
