Jol qurylysy salasyn jemqorlyq jailaǵan. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy "Ult aqparat".
"Biz bir apta buryn elimizdiń kólik-tranzit áleýetin damytý máseleleri týraly arnaiy jiyn ótkizdik. Búgin avtojol infraqurylymy salasyndaǵy túitkilderge erekshe toqtalǵym keledi. Biyl 11 myńnan astam shaqyrym jolǵa ártúrli jóndeý jumystary júrgiziledi. Buǵan 600 milliard teńgeden astam qarjy bólindi. Jóndeý jumystaryn sozbalańǵa salýǵa bolmaidy" - dedi Prezident.
Memleket basshysy jobalardy júzege asyrý barysyn qatań baqylaýǵa alý qajettigin basa aitty.
"Joldyń sapasyna airyqsha nazar aýdarý kerek. Elimizdiń joldary nashar ekeni jáne jol qurylysy salasyn jemqorlyq jailaǵany eshkimge jasyryn emes. Tipti, basqa jerdi aitpaǵannyń ózinde Aqordaǵa aparatyn joldyń ózi jamaý-jamaý, quraq kórpege uqsaityn boldy" - dedi Toqaev.
Prezidenttiń aitýynsha, bul salada qordalanǵan másele kóp.
"Tenderdi jyl saiyn birdi-ekili kompaniia ǵana utyp alady. Mundai jaǵdaidyń qaitalanyp kele jatqanyna ondaǵan jyl boldy. Osynyń bárin retke keltirý úshin shuǵyl sharalar qabyldaý kerek. Jarty jyl ótti. Al, jol jóndeýge bólingen qarajattyń 44 paiyzyna memlekettik satyp alý qorytyndysy jasalǵan joq (464 mlrd. teńgeniń 263 mlrd. teńgesi boiynsha memlekettik satyp alý qorytyndysy bar). Bul jumys Pavlodar (17%), Mańǵystaý (24%) jáne Batys Qazaqstan (27%) oblystarynda óte baiaý júrýde" - dedi Memleket basshysy.
Sondai-aq, Toqaev Qazaqstanda jol qurylysyna qajetti materialdyń bári baryn, biraq otandyq óndiristiń áleýeti tolyq qoldanylmaityny aityldy.
"Muny, tipti, qoldan jasalǵan tapshylyq deýge bolady. Mysaly, elimizde bitým óndiretin úsh zaýyt bar. Soǵan qaramastan, 200 myń tonna bitým jetispeidi. Qurylys qarqyndy júrgen kezde onyń baǵasy úsh ese (iaǵni, bir tonnasy 90 myńnan 250 myń teńgege deiin) qymbattaidy. Úkimetke jol qurylysyna qajetti resýrstardy óndirý jáne tutyný barysyn muqiiat saralaýdy tapsyramyn.
Sonyń negizinde qurylys materialdaryn shyǵaratyn jańa kásiporyndar ashý qajet. Al, jumys istep turǵan nysandardy jańǵyrtý kerek" - dedi Prezident.
