Foto: Akorda.kz
Memleket basshysy Aqmola oblysynyń ákimi Marat Ahmetjanovty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa Aqmola oblysynyń áleýmettik-ekonomikalyq damýy jaiynda baiandaldy.
Prezidentke óńir ekonomikasynyń birqatar salasynda oń nátijeler bar ekeni týraly málimet berildi. Negizgi kapitalǵa salynǵan investitsiia kólemi 530 milliard teńgege jetken. Onyń ishinde jeke investitsiia 435 milliard teńgeden asqan. 154 joba iske asyrylyp, 1,5 myń jumys orny ashylǵan.
Marat Ahmetjanovtyń aitýynsha, sharýalardy qoldaý jáne qaita óńdelgen ónim úlesin arttyrý sharalary turaqty túrde qabyldanyp jatyr. Jyl basynan beri ósimdik maiy, óńdelgen et, sút, mai, irimshik jáne súzbe siiaqty azyq-túlik túrlerin óndirý kórsetkishi ósken. Makinsk qus fabrikasynyń 3-kezeńi iske qosyldy jáne «Aq-Dala Agro» jaýapkershiligi shekteýli seriktestiginiń óndiristik qýaty kezeń-kezeńimen artyp keledi. Bul oblystyń qus etin óndirý boiynsha elimizde kóshbasshy óńirlerdiń birine ainalýyna múmkindik berdi.
Kezdesýde jylytý maýsymynyń barysyna da erekshe nazar aýdaryldy. Oblys ákimi barlyq kommýnaldyq qyzmettiń jumysy qatań baqylaýǵa alynǵanyn, Kókshetaý jáne Stepnogorsk qalalaryndaǵy nysandardyń kezeń-kezeńimen jańǵyrtylǵanyn jetkizdi.
Budan bólek, Prezidentke Kókshetaý qalasyn damytýǵa qatysty bas jospardyń jobasy ázirlengeni týraly aqparat berildi. Bul joba qalanyń ekologiialyq jáne infraqurylymdyq máselelerin sheshýdi kózdeidi.
Sonymen qatar Memleket basshysyna halyqtyń turmysyn jaqsartýǵa jáne irgeles migratsiiany tómendetýge yqpal etetin Aglomeratsiiany damytý jónindegi jańa keshendi jospardyń jobasy tanystyryldy.
Kezdesý sońynda Qasym-Jomart Toqaev óńirdi odan ári damytý, aýyl sharýashylyǵy ónimderin tereń óńdeý jobalaryn iske asyrý, investitsiia tartý, sondai-aq Aqmola oblysynyń qalalaryn jylýmen úzdiksiz qamtamasyz etý jóninde birqatar tapsyrma berdi.
