QR Prezidenti Qasym-Jomart Toqaev Abaidyń 175 jyldyq mereitoiyn merekeleý týraly Jarlyqqa qol qoidy, dep habarlaidy "Ult aqparat" Aqordaǵa silteme jasap.
Abai Qunanbaiulynyń 175 jyldyq mereitoiyn merekeleý týraly Memleket basshysynyń qaýlysy Úkimetke jeti túrli tapsyrmany júkteidi. Naqtyraq aitsaq:
"1) 2019 jylǵy 1 shildege deiin 2020 jyly qazaq halqynyń uly aqyny, aǵartýshysy Abai Qunanbaiulynyń 175 jyldyq mereitoiyn (budan ári – Abai Qunanbaiulynyń 175 jyldyq mereitoiy) daiyndaý jáne ótkizý jónindegi memlekettik komissiia qursyn;
2) 2019 jylǵy 1 qazanǵa deiin Abai Qunanbaiulynyń 175 jyldyq mereitoiyn daiyndaý jáne ótkizý jónindegi jalpyrespýblikalyq jospardy bekitsin;
3) Abaidyń «Jidebai-Bórili» memlekettik tarihi-mádeni jáne ádebi-memorialdyq qoryq-mýzeiin keshendi jańǵyrtý jóninde qajetti sharalar qabyldasyn;
4) 2020 jyly Nur-Sultan qalasynda Abai Qunanbaiulynyń 175 jyldyq mereitoiyna arnalǵan halyqaralyq ǵylymi-praktikalyq konferentsiia ótkizsin;
5) Abai Qunanbaiulynyń eńbekterin keń taralǵan negizgi shet tilderine sapaly aýdarýdy júzege asyrý, basyp shyǵarý jáne halyqaralyq ilgeriletý jóninde qajetti sharalar qabyldasyn;
6) Abai Qunanbaiulynyń 175 jyldyq mereitoiyn Birikken Ulttardyń Bilim, ǵylym jáne mádeniet máseleleri jónindegi uiymy (IýNESKO) men Halyqaralyq túrki mádenieti uiymy (TÚRKSOI) aiasynda merekeleýdi uiymdastyrý jónindegi máseleni pysyqtasyn;
7) osy Jarlyqty iske asyrý jóninde ózge de sharalar qabyldasyn" delingen.
Osy Jarlyqtyń oryndalýyn baqylaý Qazaqstan Respýblikasy Prezidentiniń Ákimshiligine júkteldi. Osy Jarlyq qol qoiylǵan kúninen bastap qoldanysqa engiziledi.
Aita ketsek, Memleket basshysy Qasym-Jomart Toqaev Shyǵys Qazaqstan oblysyna barǵan saparynda Abai Qunanbaevtyń 175 jyldyǵy memlekettik deńgeide atap ótiletinin atap ótken bolatyn.
