Uly Abaidyń murasy «Rýhani jańǵyrýdyń» mańyzdy baǵdaryna ainalýy qajet. Bul týraly Memleket basshysy Qasym-Jomart Toqaev Semei qalasynyń ziialy qaýym ókilderimen kezdesýinde aitty, dep habarlaidy "Ult aqparat" QR Prezidentiniń baspasóz hatshysy Berik Ýálige silteme jasap.
«Aldaǵy jyly Abai Qunanbaevtyń týǵanyna 175 jyl tolady. Osy aitýly datany biz tutas el bolyp, memlekettik deńgeide atap ótemiz. Biz úshin bul mereitoidyń mańyzy erekshe. Tarihi datany aqyl-parasatpen, saliqaly deńgeide ótkizýge basa mán berý kerek. Negizgi maqsat - dana Abaidyń taǵylymyn jastardyń sanasyna sińirý, uly tulǵanyń oi-tolǵamdaryn keńinen dáripteý. Úkimetke Abaidyń mereitoiyna qajetti sharalar ázirleýdi tapsyramyn. Abai, shyn máninde, qazaq bolmysynyń ainasy», - dedi QR Prezidenti.
Memleket basshysy aqynnyń dara tulǵasy - halqymyzdyń rýhaniiatyn álemge tanytatyn teńdesi joq qundylyq ekendigin basa aitty.
«Dúniejúzi ádebietinde Abai siiaqty aqyn, aǵartýshy, oishyl, synshy kemde-kem. Abai - qazaqtyń birtýar perzenti. Jidebaidaǵy keshendi jańǵyrtyp, infraqurylymdy qalpyna keltirý qajet. Hakim Abaidyń týǵan jeri dúnie júziniń túkpir-túkpirinen keletin týristerdi qarsy alýǵa laiyqty iri ortalyqqa ainalýy tiis. Jergilikti basshylar osy mańyzdy máselege nazar aýdarýy qajet. Bul - babalar aldyndaǵy boryshymyz ári óskeleń urpaq úshin jaqsy ónege. «Rýhani jańǵyrý», túptep kelgende, osy mindetti júrekpen sezinip, eshqandai nusqaýsyz oryndaý ekenin biz tereń túsinýimiz kerek», - dedi Qasym-Jomart Toqaev.
Eske sala keteiik, Qazaqstan Prezidenti Qasym-Jomart Toqaev Shyǵys Qazaqstan oblysyna jumys saparyn Semei qalasynan bastalǵandyǵy týraly habarlaǵan bolatynbyz.
