Memleket basshysy Qasym-Jomart Toqaev mańǵystaýlyq sarbaz Álibek Salamatuly Qalbaidyń qaza bolýyna bailanysty jaqyndary men týystaryna kóńil aitty, - dep habarlaidy "Ult aqparat" Prezidenttiń baspasóz qyzmetine silteme jasap.
"Memleket basshysy Qasym-Jomart Toqaev Jambyl oblysyndaǵy Gvardeisk áskeri qalashyǵynda mańǵystaýlyq sarbaz Álibek Salamatuly Qalbaidyń qaza bolýyna bailanysty jaqyndary men týystarynyń orny tolmas qaiǵysyna ortaqtasyp, kóńil aitty.
Prezidenttiń pikirinshe, beibit kúnde áskerdegi sarbaz qaza bolmaýǵa tiis. Ata-ana balasyn áskerge jibergende onyń qaýipsizdigi úshin alańdamaýy kerek. Bul – memleketimizdiń moinyna alǵan mindeti.
Prezident osy oqiǵaǵa qatysty Bas prokýratýra men Qorǵanys ministrligine jáne quzyrly organdarǵa jaýyngerdiń ólimine qatysty jan-jaqty tekserý júrgizýdi jáne shynaiy sebebin anyqtaýdy tapsyrdy" - delingen habarlamada.
Aita keteri, 23 sáýirde Jambyl oblysyndaǵy 30212 áskeri bólimde merzimdi áskeri qyzmetke shaqyrylǵan Álibek Qalbai qaitys bolǵany belgili boldy. 18 jastaǵy sarbaz Mańǵystaýdan shaqyrylyp, bes kún buryn Qordaidaǵy áskeri bólimge barǵan.
"Tańerteń sapqa turý kezinde sarbaz esinen tanyp qaldy. Oǵan meditsinalyq kómek kórsetildi. Alaida ol esin jimastan qaitys boldy", - delingen resmi habarlamada.
Álibektiń týystary ministrliktiń málimdemesine senbei otyr. Olar jas jigitti soqqyǵa jyqty dep sanaidy. Álibektiń ózi áskerge barǵysy kelmegen. 13 sáýirde áskerge shaqyryp, meditsinalyq tekseristen ótkizgen. Sóitip, 18 sáýirde áskeri boryshyn óteýge jibergen.
