Eraly Toǵjanov áskeri qoimalardaǵy jarylystan zardap shekken Baizaq aýdanynyń turǵyndaryna kómek kórsetý jáne qalpyna keltirý jumystarymen tanysty, dep habarlaidy primeminister.kz.
Vitse-Premer inspektsiia barysynda kentti qalpyna keltirý tolyq qarqynmen júrgizilip jatqanyna kóz jetkizdi. Bul sharalarǵa 185 adam men 23 arnaiy tehnika jumyldyrylǵan. Qazirdiń ózinde 62 jeke qurylystyń jóndeý jumystary aiaqtaldy.
Jibek joly aýylynda 150 oryndyq jańa mektep salý jumystary bastaldy. Sondai-aq Úshbulaq jáne Bazarbai aýyldaryndaǵy mektepter demeýshilik qarajat esebinen qalpyna keltirildi.
Tarazda Toǵjanov «Super Pharm» JShS-de boldy. Jambyl oblysynyń ákimi Berdibek Saparbaev óńirde farmatsevtikalyq ónim shyǵarý kólemi artyp kele jatqanyn atap ótti. Munda táýligine 60 myń meditsinalyq maska, jylyna 15 mln meditsinalyq buiym shyǵarylady.
Óńirdegi iri jobalardyń biri – «Amir jáne D» JShS farmatsevtikalyq baǵyttaǵy óndiristik kesheni. Zaýytta jylyna 15 mln ekspress-test, onyń ishinde koronavirýs, A, V, S gepatitterin anyqtaýǵa arnalǵany bar, 1,5 mln baqylaý eritindisi jáne basqa da meditsinalyq maqsattaǵy ónimder shyǵarylatyn bolady.
Vitse-Premer sondai-aq «Sáýle» JShS konditerlik fabrikasyna bardy jáne oblystyq onkologiialyq dispanserdiń qurylys barysymen tanysty. Qazirgi ýaqytta onkoortalyqtyń ishki árleý jumystary 90%-ǵa, syrtqy árleý jumystary 95%-ǵa aiaqtaldy. Dispanser álemdik standarttarǵa sáikes keletin tehnologiialyq jabdyqtarmen jaraqtandyrylatyn bolady.
Toǵjanov jeke investitsiialar esebinen salynǵan «Arai–Elite» gimnaziiasynda boldy. Mektepte 1 400 bala tegin bilim alady. Oqýshylar matematika men aǵylshyn tilin tereńdetip oqidy.
«Kóne Taraz» tarihi-etnomádeni keshenin aralaý barysynda vitse-premer Tarazdyń sáýleti túbegeili ózgeriske ushyraǵanyn atap ótti. Keshen aýmaǵynda birkelki stilde birneshe nysan salynǵan, atap aitsaq: ashyq aspan astyndaǵy amfiteatr, kórkemsýret galereiasy, oblystyq tarihi-ólketaný mýzeii, Sherhan Murtaza atyndaǵy «Rýhaniiat jáne tarihtaný» ortalyǵy, sheberler men qolónershiler galereiasy, týrizm ortalyǵy, kórme pavilony.
