Búgin QR Premer-Ministriniń orynbasary Eraly Toǵjanov QR Prezidenti janyndaǵy jastar saiasaty jónindegi keńestiń, Prezidenttik jastar kadrlyq rezerviniń múshelerimen, jastar uiymdarynyń ókilderimen, jas kásipkerlermen, jas ǵalymdarmen jáne belsendilermen Astana hub aýmaǵynda kezdesý ótkizdi, dep habarlaidy QR Úkimeti janyndaǵy Qazaqstanda koronavirýstyń taralýyna jol bermeý jónindegi vedomstvoaralyq komissiiasynyń Telegram arnasy.
Shara barysynda qatysýshylar jastar saiasatyn iske asyrý men olardy qoldaý jónindegi memlekettik sharalar, sondai-aq Qazaqstan Respýblikasynyń Konstitýtsiiasyna engizilýi josparlanǵan túzetýler boiynsha aldaǵy referendýmnyń mindetterin talqylady.
Toǵjanov jastardy qoldaý baǵytynda Úkimet birqatar aýqymdy jumys júrgizip jatqanyn atap ótti. Máselen, 2025 jylǵa deiin orta arnaýly kásiptik bilim berýdi aqysyz etý josparlanyp otyr. Ondaǵan myń grant bólinetin úzdik halyqaralyq ýniversitetter elimizde óz filialdaryn ashýda. Sondai-aq, jas ǵalymdarǵa da qoldaý kórsetiledi. Úkimet jas ǵalymdardyń sanyn 50%-ǵa deiin arttyrý mindetin qoidy.
QR Premer-Ministriniń orynbasary jumyspen qamtý máseleleriniń oń sheshimin taýyp jatqanyn atap ótti. Kommertsiialyq ideialarǵa 10 myń grant bólinýde, olardyń somasy 1,2 million teńgege deiin ulǵaidy. 2025 jylǵa deiin 2 mln.qazaqstandyq úshin jańa jumys oryndaryn ashý josparlanýda.
"Jastardyń negizgi problemalarynyń biri - turǵyn úimen qamtamasyz etý bolyp tabylady. Biz 2025 jylǵa qarai turǵyn úi qurylysynyń barlyq baǵdarlamalary sheńberinde jas otbasylar úshin 25% kvota engizýdi kózdep otyrmyz. Búgingi kúni 3 óńirde iske asyrylyp jatqan Otbasy bankiniń jeńildetilgen ipoteka baǵdarlamasyn barlyq óńirde iske qosý josparlanyp otyr", - dedi Toǵjanov.
Sondai-aq Eraly Toǵjanov Memleket basshysymen alǵa qoiylǵan mindetter týraly aitty.
16 naýryzda Prezident Q. Q. Toqaev Qazaqstan halqyna "Jańa Qazaqstan: Jańarý men jańǵyrý joly" atty Joldaýyn arnady. Joldaý aiasynda saiasi reformalardyń jalpy Qazaqstannyń júieli transformatsiiasyna yqpal etetin jáne memlekettiń uzaq merzimdi damýynyń jańa paradigmasyn aiqyndaityn 10 basym baǵyty belgilendi.
"Qoǵam men eldiń ómirine jan-jaqty áser etetin saiasi júieni qaita iske qosýdyń órshil maqsattary aiqyndaldy" - dep atap ótti vitse-premer.
Talqylaý barysynda qatysýshylar ózderin qyzyqtyrǵan suraqtaryn qoiyp, ózekti máseleler boiynsha pikir almasty, sondai-aq jastar saiasatyn jetildirý boiynsha usynystaryn da jetkizdi.
Kezdesý qorytyndysy boiynsha Eraly Toǵjanov qatysýshylardy aldaǵy referendýmǵa belsendi qatysýǵa shaqyrdy. Jastar vitse-premerdiń úndeýin biraýyzdan qoldady.
