Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Halqymyzda «ótkenge salaýat, keleshekke amanat» degen ataly sóz bar. Ótken tarihymyzdyń jaqsy jaqtary bolǵanymen aqtańdaq tustary da az emes. Sol sebepti elimizdiń Táýelsizdiginiń 30 jyldyǵy aiasynda qoǵamymyzdy kópten tolǵandyryp, kóterilip júrgen tarihtyń aqtańdaq tustaryn aiqyndap, jazyqsyz sottalǵan, qýǵyn-súrginge ushyraǵan azamattardy aqtaý elimizdiń, halqymyzdyń, qoǵamnyń aldynda turǵan úlken mindet retinde qarastyrýǵa bolady», - dedi Eraly Toǵjanov Ortalyq kommýnikatsiialar qyzmetindegi baspasóz máslihatynda.
Osy rette ol QR Prezidenti Qasym-Jomart Toqaevtyń arnaýly Jarlyǵymen Saiasi qýǵyn-súrgin qurbandaryn tolyqtai aqtaý jónindegi memlekettik komissiia qurylǵanyn atap ótti.
«Memlekettik komisiia elimizge belgili tarihshy ǵalymdardyń, qoǵam qairatkerleriniń, Parlament deptýtattarynyń jáne memlekettik organdardyń ókilderinen – 49 adamnan turady. Jalpy memlekettik komissiianyń aldynda birneshe naqty mindetter bar. Birinshiden, saiasi qýǵyn-súrgin qurbandaryna qatysty tarihi ádildikti qalpyna keltirý máseleleri. Ekinshiden, jazyqsyz sottalǵan jáne saiasi qýǵan-súrginge ushyraǵandardy aqtaý protsesterin ǵylymi zerdeleý. Sonymen qatar jabyq muraǵattardaǵy qýǵyn-súrgin jónindegi materialdardyń zertteýshilerge qoljetimdi bolýyn qamtamasyz etý máselesi de aldymyzda turǵan úlken suraqtardyń biri. Munan bólek, elimizdiń azattyǵy, táýelsizdigi men tutastyǵy úshin kúreste erlik kórsetken saiasi qýǵyn-súrgin qurbandaryn máńgi este qaldyrý boiynsha da usynystar ázirleý siiaqty mańyzdy mindetter júktelip otyr. Komissiiaǵa Memlekettik hatshy Qyrymbek Kósherbaev jetekshilik etedi. Jarlyqqa sáikes, komissiianyń jumys organy retinde Bilim jáne ǵylym ministrligi bekitilgen», - dedi Úkimet basshysynyń orynbasary.
