Aqtóbe oblysynyń ákimi bolyp taǵaiyndalǵan Eraly Toǵjanov jańa qyzmetin Prezidenttiń artqan úlken senimi dep baǵalaitynyn málim etti, dep habarlaidy QazAqparat tilshisi.
«Aqtóbege barǵan soń komandany ózgertesiz be? Ondaǵylar alańdap jatyr», - dep surady BAQ ókili jańa taǵaiyndalǵan ákimnen.
Toǵjanov Úkimet quramyndaǵy tájiribesin eske salyp, olai alańdaýǵa negiz joq degen oi aitty.
«Ol másele boiynsha alańdaýdyń qajeti joq. Úkimetke aýysqanda jalǵyz ózim keldim dep aitýǵa bolatyn shyǵar. Ózimmen birge eshkimdi ertip ákelgen joq edim. Bári Memleket basshysynyń búgin aldymyzǵa qoiǵan mańyzdy mindetterine jáne sondaǵy ózekti máselelerdi sheshý jolyndaǵy mamandardyń jaýapkershilik deńgeiine bailanysty», - dedi Aqtóbe oblysynyń ákimi.
Sondai-aq, ol óńirdegi eń ózekti problema joldar men halyqtyń tabysyn arttyrý ekenin atap ótti.
«Aqtóbe oblysynyń áleýeti óte zor. Aýmaǵy boiynsha da, halqynyń sany boiynsha da eń úlken oblystardyń biri. Sondyqtan úlken senim bildirdi. Sol senim men halyqtyń qoldaýyn aqtaý kerek», - dedi Eraly Toǵjanov.
