«Tobyl» direktory klýbtaǵy sońǵy jaǵdailar týraly túsinik berdi, dep habarlaidy "Ult aqparat" klýbtyń resmi saityna silteme jasap.
Nikolai Panin belgili fýtbol mamany Vladimir Gazzaevpen ne úshin kelisimshartty úzgenin túsindirdi. Onyń aitýynsha, komandadaǵy qarjylyq jaǵdai osyndai sheshim qabyldaýǵa májbúr etken.
«Aldymen, qazaqstandyq barsha jankúier aldynda keshirim suraimyn. Eýropa ligasynda sátsizdikke ushyraǵanymyz ras. Árine, kez kelgen ujymda mundai jaǵdailar bolady. Qazir biz sondai kúi keship otyrmyz. Fýtbolshylar da, klýbtyń jumyskerleri de shamaly daǵdarysty bastan ótkerip jatyr. Biz Vladimir Valerevichke Qostanaidaǵy eńbegi úshin rahmet aitamyz. Degenmen, «Tobyldyń» biýdjeti bárin kótere bermeidi. Biýdjetti ońtailandyrý Eýropa ligasyna deiin de qozǵaldy. Komandaǵa Eýropa ligasynyń eki kezeńinen ótý mindeti qoiyldy. Munan soń biz ÝEFA tarapynan túsetin tólemderge úmit arttyq. Degenmen, biz birinshi kezeńnen ári asa almadyq. Qazir klýbta shyǵyndar qaita eseptelip jatyr. Komanda basshylyǵy fýtbolshylarǵa jumsalatyn qarjyny azaitý týraly usynys aitty. Alaida, Vladimir Gazzaev bul usynysty qoshtamady, munan soń ózi jumystan ketýge sheshim qabylady. Onymen birge kómekshisi Nikolai Latysh ta ketti», - deidi Nikolai Panin.
Sonymen qatar, komandadaǵy qiyn jaǵdaidy eskergen tehnikalyq direktor Vladimir Nidergaýs pen bapker Andrei Miroshnichenko da óz erkimen jumystan ketken. Alaida, qazir komanda quramyndaǵy fýtbolshylar jalaqynyń tómendeýine qarsylyq bildirmegen.
«Vladimir Gazzaev suhbatynda komandanyń «altynǵa» talasatynyn aitqan edi. Bul durys emes. Qarjylyq jaǵdaidyń qiyndaǵany sonshalyq, chempiondyq týraly áńgime bolǵan emes. Jaqynda «Astananyń» jyldyq biýdjetiniń bizden úsh ese joǵary ekenin bildik. Biz birinshi oryn alý úshin áýeli quramdy kúsheitýimiz kerek. Al ol úshin qarjynyń keregi sózsiz», - dep túidi klýbtyń direktory.
Eske salsaq, Eýropa ligasyndaǵy sátsiz oiynnan soń «Tobyl» fýtbol klýbynyń bas bapkeri Vladimir Gazzaev jumysynan ketken bolatyn.
