Búgin «Astana Arenada» 2019/2020 jylǵy Eýropa ligasyna irikteý kezeńiniń alǵashqy raýndy aiasynda Qostanaidyń «Tobyly» Liýksembýrgtyń «Jóness Esh» komandasyn qabyldady, dep xabarlaidy QazAqparat.
Oiynnyń alǵashqy minýttarynan-aq shartty túrde alań ieleri sanalatyn qostanailyqtar dopty baqylaýynda ustaýǵa tyrysty.
Al qonaqtar olardyń ár qadamyn ańdyp, qarsy shabýyldardy utymdy paidalanbaq boldy. Qonaqtardyń qyraǵy qorǵanys shebi «Tobyldyń» shabýyldaýshylaryn birshama tusap ustady da.
21-minýta qostanailyqtardyń sol qanattan uiymdastyrǵan shabýylyn óreskel toqtatqany úshin grekiialyq tóreshi Emmanýil Skoýlas aiyp dobyn belgiledi. Aiyp alańyna asyrylǵan dopqa talas kezinde qonaq komandanyń qorǵaýshylary «Tobyldyń» 8-nómirdegi qorǵaýshysy Viktor Dmitrenkodan kóz jazyp qaldy. Sony utymdy paidalanǵan Viktor jyldamdyq tanytyp, oiyndaǵy alǵashqy goldy soqty.
Birinshi taimda basqa gol soǵylǵan joq.
2-taim da tartysty boldy. Qonaqtardyń sirek qarsy shabýyldarynyń birinde qostanailyqtar aiyp alańynyń ishinde ereje buzdy. Penaltidi 59-minýtta qonaqtardyń 21-nómirdegi qorǵaýshysy qaltqysyz oryndap, esepti teńestirdi.
Esh qalasynda ótken alǵashqy matchta 0-0 esebi tirkelgen bolatyn. Syrt alańda soǵylǵan gol erejesi boiynsha, «Jóness» kelesi kezeńge joldama aldy.
Aita keteiik, «Tobyl» fýtbol klýby baspasóz qyzmetiniń málimdeýinshe, Qostanai áýejaiynda jóndeý jumystary júrgizilýine bailanysty, «Tobyl» Eýropa ligasyndaǵy óz alańynda ótetin matchyn «Astana Arenada» ótkizdi.
