TMD-da ortaq viza engizý múshe memleketterdegi týrizm salasyna oń áserin tigizýi múmkin, dedi RIA Novosti portalyna bergen suhbatynda RF syrtqy ister ministrligi basshysynyń orynbasary Andrei Rýdenko.
"Árine, TMD keńistiginde ortaq viza engizý múmkindigi Dostastyq elderiniń basqa memlekettermen iskerlik jáne týristik bailanystaryn damytýǵa oń áserin tigizer edi. Degenmen TMD-ǵa múshe ár el óziniń viza jáne kóshi-qon saiasatyn júzege asyratynyn eskermeýge de bolmaidy", - dedi Resei SIM basshysynyń orynbasary.
Rýdenkonyń aitýynsha, Táýelsiz memleketter dostastyǵy elderiniń osy saladaǵy ulttyq zańnamalary bir-birimen sáikes kele bermeidi.
"Biz Qazaqstan Prezidenti Qasym-Jomart Toqaevtyń bul máseleniń áýeli barlyq quzyrly vedomstvonyń qatysýymen sarapshylyq deńgeide jan-jaqty zerttelýi tiis degen ustanymyna qosylamyz", - dedi ol.
Rýdenkonyń pikirinshe, ortaq vizany qajet etetin elder men olardyń kóshi-qon zańnamasyn bir-birine uqsas etý turǵysynan tiisti sheshimder qabyldaý daiyndyǵyn anyqtaý qajet.
"Buǵan qosa, osyndai biryńǵai vizany engizý úshin atqarylatyn jumystyń kólemin baǵalaý mańyzdy. Bul úlken jáne tez júzege asa qoimaityn is. Sondyqtan qazir bundai mehanizmdi iske qosýdyń qandai da bir naqty merzimderi týraly aitý áli erte", - dep atap ótti Rýdenko.
Eske sala keteiik, Qazaqstan Prezidenti Qasym-Jomart Toqaev TMD elderinde "shengen" siiaqty ortaq viza engizý máselesin qarastyrýdy usynǵan edi. Bul týraly Memleket basshysy Ashhabadta ótken TMD-ǵa múshe elder basshylary keńesiniń otyrysynda aitty.
Qazaqstan Prezidenti bundai viza Dostastyq elderindegi týrizmdi damytýǵa yqpal eter edi deidi.
Al, 2018 jylǵy maýsymda Dariǵa Nazarbaeva Ortalyq Aziia elderi úshin "aziialyq shengen" qurý ideiasyn aitqan bolatyn. Joba 2019 jyldyń basynda júzege asady dep boljanǵan edi.
Degenmen Qazaqstan Syrtqy ister ministrliginiń málimetinshe, "aziialyq shengen" qurý jáne engizý máselesi uzaǵyraq ýaqytty qajet etedi.
