«Zerdeli» shaǵyn aýdanyndaǵy qisaiǵan úidiń turǵyndary nesieni qaita qurylymdaý týraly ótinishpen «Qazaqstannyń turǵyn úi qurylys jinaq bankine» (JSBB) júginbedi, dep habarlaidy "Ult aqparat".
«Bul úige bizdiń salymshylar qonystandy. Bul «Qoljetimdi baspana» baǵdarlamasy aiasyndaǵy «Jastarǵa arnalǵan baspana», dep atalatyn baǵdarlama bolatyn. Búgingi tańda onda 72 turǵyn bar, onyń 19 turǵyny turǵyn úi nesiesin tóleýge aýysqan. Olardyń satyp alý múmkindigi bar. Qalǵan 47 turǵynnyń bankte esepshottary bar jáne olar qarjy jinaqtaýdy jalǵastyrýda. Búgingi kúni úi turǵyndary ýaqytsha basqa jaqqa qonys aýdardy. Olarǵa jalǵa alǵan páterleriniń aqshasyn tólep beredi. Ázirge olar bizden qaita qurylymdaýdy suraǵan joq», - dedi Qazaqstannyń turǵyn úi qurylys jinaq banki» AQ basqarma tóraiymy Lázzat Ibragimova baspasóz máslihatynda.
Ol bank óziniń klientterimen kezdesýge jáne qaita qurylymdaýdyń yqtimal nusqalaryn qarastyrýǵa daiyn ekenin atap ótti.
«Biz 15 qańtarda shyǵatyn saraptama qorytyndysyn kútip otyrmyz. Olar baspana nesiesin keshiktirmei tólep otyr. Sebebi, olardyń ýaqytsha jaldaǵan páterleriniń aqshasyn qalalyq ákimdik óz moinyna aldy», - dedi Lázzat Ibragimova.
Eske salaiyq, 11 jeltoqsanda Alataý aýdanyndaǵy «Zerdeli» shaǵyn aýdanynyń turǵyndary úileriniń qisaiǵanyn aityp, dabyl qaqqan bolatyn.
Keiin Baqytjan Saǵyntaev qisaiǵan úidiń turǵyndarymen kezdesip, ákimdik olardy kóshirýge daiyn ekendigin jetkizdi.
