Qala prokýratýrasynyń talap aryzy boiynsha Shymkent qalasyndaǵy Sport saraiy (qazirgi Muz saraiy) memleketke qaitaryldy.
2017 jyly Shymkent qalasynyń «Sport saraiy» JShS-nyń 67,09% úlesi jekeshelendirilip, quny 1 mlrd teńgege, iaǵni naryqtyq qunynan 8 ese az somaǵa satylǵany anyqtaldy.
Sonymen qatar Sport saraiyn satyp alǵan uiym jekeshelendirý rásimine zańsyz jiberilgen jáne jarǵylyq qujattarǵa sáikes sport salasyndaǵy qyzmettermen ainalysýǵa quqyǵy joq bolǵandyqtan, aýktsionǵa qatysýshy retinde tirkelýge jatpaidy.
Sport saraiy ońtústik óńirlerde qysqy sport túrlerin daiyndaityn jalǵyz oryn sanalady.
Obektini jekeshelendirý kezinde memleket múlkin qoǵam igiligine tiimdi paidalaný qaǵidasyna sáikes basqarýdy mindetteitin Memlekettik múlik týraly zańnyń normalary buzylǵan.
Sondai-aq 5 jyl ishinde memleket Sport saraiynyń úi-jaiyn jalǵa alýǵa 1 mlrd teńgeden astam qarjy jumsaǵan.
Shymkent qalasynyń mamandandyrylǵan aýdanaralyq ekonomikalyq sotynyń 2024 jylǵy 27 mamyrdaǵy sheshimimen jekeshelendirý nátijesi joiyldy.
Qazirgi ýaqytta sheshim zańdy kúshine endi.
