«Kinematografiia týraly» zań jańa kúshine engenimen kinoteatrlarda filmder qazaq tiline nege sapasyz aýdarylyp jatyr? Bul suraqqa Facebook-taǵy paraqshasynda Mádeniet jáne sport ministri Arystanbek Muhamediuly jaýap berdi, dep habarlaidy "Ult aqparat".
Aita ketsek, osydan birneshe kún buryn áleýmettik jeliniń qoldanýshylary kinoteatrlarda filmniń qazaq tilindegi titr arqyly berilýine qatysty shaǵym bildirgen edi. Olardyń jazýynsha, titr tym sapasyz aýdarylǵan. Tipti titr sóziniń ishinde qazaq tilindegi sózben aralas orys tilindegi sózder de júr.
«Kinokórsetýshiler filmderdiń qazaq tiline aýdarylýyn qamtamasyz etý barysynda týyndaǵan máselemen bóliskim kelip otyr. Biyl qabyldanǵan «Kinematografiia týraly» zańǵa sáikes prokattaǵy filmderdi titr berý nemese dýbliaj arqyly memlekettik tilge aýdarýdy kinoprokat quqyǵyn ielenýshi distribiýtor qamtamasyz etedi. Memlekettik tilge kásibi dýbliaj jasalǵan filmderdiń sirek kezdesýiniń sebebin túsindirýde distribiýtorlar onyń qymbatshylyǵyna silteidi. Dýbliajǵa jumsalǵan qarjy filmniń Qazaqstandaǵy kórsetiliminen túsken paidadan asyp túsýi múmkin, sondyqtan kóbinese titr arqyly aýdarmaǵa júginedi», - dep jazdy ministr.
Arystanbek Muhamediulynyń jazýynsha, ókinishke qarai, filmderdi qazaq tiline aýdarǵanda keibir kinokórsetýshiler tarapynan qatelerge jol beriledi.
«Mysaly, «Mýmbai oteli: Taitalas» filminde osy jaǵdai kezdesti. Kórermenderden túsken shaǵymdar negizinde atalǵan filmniń prokatqa berilgen kýáligin alyp qoiý týraly sheshim qabyldadyq. Kinoprokat quqyǵyn ielenýshilerge filmderdi memlekettik tilge grammatikalyq qatesiz, maǵynasyn túsinikti etip, kórermenderdiń renishin týdyrmaityndai qylyp aýdarýdy ótinemin. Qatań shara qoldanǵymyz kelmegenimen, «Kinematografiia týraly» zańnyń iske asýy biz úshin óte mańyzdy. Sizder túsinistikpen qabyldaidy dep senemin», - dedi ministr.
