Qazaqstan turǵyndary turǵylyqty jeri boiynsha tirkelgeni týraly málimetti eGov.kz portaly men eGov Mobile mobildi qosymshasy arqyly ala alady. Bul týraly «Ulttyq aqparattyq tehnologiialar» AQ-nyń baspasóz qyzmeti málimdedi, dep habarlaidy ult.kz.
Atalǵan servis memlekettik organdarǵa barmai-aq turǵylyqty jer boiynsha tirkelý týraly aqparat alýǵa múmkindik beredi. Eger málimetti úshinshi tulǵa suratsa, onda derekteri suralatyn azamattyń kelisimi mindetti túrde qajet.
Qyzmetti paidalaný úshin:
eGov.kz portalyna avtorizatsiiadan ótý;
«Úshinshi tulǵalardyń turǵylyqty jeri boiynsha mekenjai málimetterin alý servisi» qyzmetin tańdaý;
azamattyń JSN-in engizý;
suranysty elektrondyq tsifrlyq qoltańbanyń (ETsQ) qoljetimdi tásilderiniń birimen rastaý qajet.
Azamat kelisim bergennen keiin suratylǵan málimetter paidalanýshynyń jeke kabinetinde qoljetimdi bolady.
Eske salaiyq, Qazaqstanda 2019 jylǵy 1 qarashadan bastap mekenjai anyqtamalarynyń kúshi joiyldy. Sondyqtan turǵylyqty jeri boiynsha tirkelý týraly málimet qajet bolǵan jaǵdaida azamattarǵa osy elektrondyq qyzmetti paidalaný usynylady.
Sonymen qatar, jalǵa alynǵan páterde nemese úide 10 kúnnen artyq turatyn azamattar ýaqytsha tirkeýge turýǵa mindetti.
Turǵyndardy tirkeýge kim mindetti?
«Turǵyn úi qatynastary týraly» Qazaqstan Respýblikasynyń Zańyna sáikes, jalǵa beriletin turǵyn úide 10 kúnnen astam turatyn azamattardy tirkeý mindeti jalǵa berýshige júkteledi.
Jalǵa berýshi retinde tek turǵyn úidiń menshik iesi ǵana emes, onyń ókili nemese turǵyn úidi jalǵa alyp, ony qosalqy jalǵa (sýbarendaǵa) beretin azamat ta áreket ete alady. Bul talap 2017 jyly terrorizmge qarsy zańnamalyq túzetýler engizilgennen keiin kúshine endi.
Jalǵa berýshilerge qandai aiyppul qarastyrylǵan?
Turǵyndardy ýaqytynda tirkemegen jaǵdaida:
alǵash ret – 10 AEK (43 250 teńge) kóleminde aiyppul;
bir jyl ishinde qaitalansa – 20 AEK (86 500 teńge) kóleminde aiyppul salynady.
Jalǵa alýshylarǵa da jaýapkershilik qarastyrylǵan
Ýaqytsha nemese turaqty tirkeýsiz turatyn azamattar da ákimshilik jaýapkershilikke tartylady.
Qazaqstan Respýblikasynyń Ákimshilik quqyq buzýshylyq týraly kodeksiniń 492-babyna sáikes:
alǵash ret – 7 AEK (30 275 teńge) kóleminde aiyppul;
bir jyl ishinde qaitalansa – 13 AEK (56 225 teńge) kóleminde aiyppul salynady.
