QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Timýr Sultanǵaziev meditsina qyzmetkerlerine tólem jasaý máselesine qatysty túsinik berdi, dep habarlaidy "Ult aqparat".
«Meditsina qyzmetkerlerine birjolǵy áleýmettik tólem jasaý máselesi ózekti ári óte mańyzdy. Densaýlyq saqtaý ministrligi epidemiiaǵa qarsy sharalarǵa qatysqan barlyq meditsina qyzmetkerlerin tiisti áleýmettik tólemdermen qamtamasyz etý úshin barlyq qajetti sharalardy jasap jatyr. Meditsina qyzmetkerlerine tólenetin birjolǵy áleýmettik tólem boiynsha qazirgi jaǵdaiǵa toqtalaiyn. Aýyrǵan dárigerler úshin jaǵdai mynadai sipatta: pandemiia jariialanǵannan beri elimiz boiynsha atalǵan infektsiia juqtyrǵan densaýlyq saqtaý qyzmetkerleriniń sany 12 830 adam. Onyń ishinde kásiptik qyzmetti júzege asyrý kezinde kovid jáne pnevmoniiamen syrtqattanýshylar boiynsha 8 442 ótinim kelip tústi, sondai-aq olardy óńirlik komissiialar qarady. Osylardyń ishinde óńirlik deńgeide ótinimderdiń 68 paiyzy nemese 5 559-ynyń jaǵdaiy rastalǵan bolatyn», - dedi T. Sultanǵaziev Ortalyq kommýnikatsiialar qyzmetinde.
Onyń sózine qaraǵanda, qazirgi kezde ótemaqyny 4 550 meditsina qyzmetkeri aldy.
«Ólim jaǵdailary boiynsha óńirlik komissiialarda 82 jaǵdai qaraldy, jalpy 182 jaǵdaidyń ishinde. Qazirgi ýaqytta ótinimniń 45-i sáikesinshe tólemaqyny alǵan bolatyn», - dedi komitet tóraǵasy.
«Ótinimderdi qoldaý úshin Densaýlyq saqtaý ministrligi tiisti jumystardy jasap jatyr. Birinshiden, jumys tobyn quryp, ol onlain rejimde ótinimderdi qabyldaýdyń barlyq sebepterin pysyqtaýda. Aýyrǵan jáne qaitys bolǵan adamdar boiynsha derekterdi naqtylap, ótinimderdi rásimdeý jóninde jol berilgen ereje buzýshylyqtarǵa taldaý júrgizdi. Ekinshiden, Meditsinalyq áleýmettik saqtandyrý qorymen birlesip, tiisti problemalar men qatelikterdi der kezinde sheshý jumystaryn júrgizýde. Sonymen birge, ótinimderdi qabyldaý protsesin jeńildetý úshin aýrýlardy kodtaýǵa jazbasha túsinikteme berip, qazirgi kezde qabyldanǵan ótinimder sany eki esege artty. Tórtinshiden, Densaýlyq saqtaý ministrligi ákimdikterden kún saiyn aqparat jinap, monitoring júrgizip jatyr», - dedi Timýr Sultanǵaziev.
