QR Prezident Ákimshiligi basshysynyń orynbasary Timýr Súleimenov Prezidenttiń shaǵyn biznesti úsh jylǵa salyqtan bosatý týraly sheshimine pikir bildirdi, dep habarlaidy QazAqparat.
«Biz «shaǵyn jáne orta biznes» uǵymyna úirenip qalǵanbyz. Bul joly tek shaǵyn biznes salyqtan bosatylady. Sebebi, orta biznes – óz aiaǵynda nyq turǵan, óndiristik bazasy men tehnologiiasy bar kásiporyn. Sondyqtan, olar elimizdegi salyq júiesiniń negizgi tiregi bolýy tiis. Salyq Kodeksinde olarǵa túrli jeńildikter qarastyrylǵan, sondyqtan eldiń biýdjettik turaqtylyǵy turǵysynan qaraǵanda orta biznesti salyqtan bosatý durys emes», - dep túsindirdi T. Súleimenov «Habar 24» arnasynda tikelei efirde bergen suhbatynda.
Onyń aitýynsha, Qazaqstandaǵy mikro jáne shaǵyn biznes salyqtary biýdjet tabysynyń 8,4% quraidy.
«Bul reforma biýdjetke az shyǵyn keltire otyryp, úlken ekonomikalyq nátije alýǵa septigin tigizedi. Prezident Úkimetke mikro jáne shaǵyn biznes kompaniialaryn tabys salyǵynan 3 jylǵa bosatý týraly zańdy negiz qurýdy tapsyrdy. Munda temeki, ishimdik syndy aktsizdik taýarmen ainalysatyndar, jer qoinaýyn paidalanatyndar syndy keibir sanattar jeńildikke ilinbeidi. Sonymen birge, qyzmetker men jumysshy jaldap otyrǵan kásipkerler salyqtan bosatylady. Biz budan úlken nátije kútip otyrmyz», - dedi Timýr Súleimenov.
Eske sala ketsek, búgin QR Prezidenti Qasym-Jomart Toqaev Qazaqstan halqyna Joldaýyn oqydy.
