Qazaqstannyń syrtqy saýda ainalymy turaqty ósý úrdisin saqtap otyr. 2018 jyldyń alǵashqy 8 aiynda 21,6% (59,8 mlrd AQSh dollary) ósim baiqaldy, dep habarlaidy QazAqparat tilshisi.
Bul týraly QR Ulttyq ekonomika ministri Timýr Súleimenov 2018 jyldyń 10 aiyndaǵy áleýmettik-ekonomikalyq damý qorytyndylary týraly baiandamasynda aitty.
«Eksport 28,2% (39,1 mlrd AQSh dollaryna) ósti. Bul munaidy (45,4%), agroónerkásip kesheni ónimderin (30,1%), munai gazdaryn (30,2%), aliýminiidi (24%) jáne mys kenderin (12,5%) jetkizýdiń artýyna bailanysty», - dedi ministr Úkimet otyrysynda.
Óz kezeginde import 10,8% (20,8 mlrd AQSh dollaryna) ósti. Kóbinese ol importtalatyn investitsiialyq taýarlar (mashina jáne jabdyqtar) esebinen ósken.
«Investitsiialyq taýarlar importynyń ósýi 20,4% qurady. Sondai-aq, qara metal jáne farmatsevtika ónimderiniń importy tiisinshe 15,8% jáne 13,6% ósti», - dep óz sózin tolyqtyrdy T. Súleimenov.
