Reseilik reper Timati (Timýr Iýnýsov) Gýfpen (Aleksei Dolmatov) birge túsirgen «Máskeý» klipin YouTube jelisinen óshirip tastady. Qala kúni Máskeý qalalyq dýmasy sailaýynyń qarsańynda jariialanǵan video reseilik YouTube-ta eń kóp dizlaik jinaǵan video boldy. 7 qyrkúiekte shyqqan klipke 62 myńnan asa adam – laik, 1 million 400 myń adam dizlaik qoiǵan.
Reseilik jeli qoldanýshylary Timati klipindegi «Mitingilerge barmaimyn, dalbasalamaimyn», «[Máskeý meri Sergei] Sobianinniń densaýlyǵy úshin býrgerdi soǵyp alamyn» jáne «Bul – gei-parad ótkizbeitin qala» degen sózderin synǵa alǵan. Kórermender «klipti bilik tapsyrysy» dep, reperlerdi «satylyp ketti» dep aiyptaǵan.
Videony óshirgenge deiin Timati Instagram paraqshasyna «toqtaýsyz negativti doǵarý úshin» videony óshirgeli jatqanyn jazǵan. Timati «Klip úshin uialmaimyn. Eshqandai aqsha alǵam joq. Biznesimdi qutqaryp jatqan joqpyn. Eshkimdi renjitkim kelmedi» dedi. «Jastar arasynda bilikti sógý sánge ainalyp ketti» degen reper óziniń «Máskeý merin sheksiz qurmetteitinin» aitqan. Kliptegi mitingiler týraly sózder jaily pikir bildirgen ol «Narazylyqqa shyǵatyndardyń jartysy saiasi sharalarǵa qatysqanyna aqsha alady. Olardyń ailyq alyp otyrǵan kýratorlary, uiymdastyrýshylary bar. Munyń bárin kim qarjylandyratynyn uǵý qiyn emes» dedi.
Reper Gýf klip úshin tyńdarmandarynan keshirim suraǵan. Ol video jariialanǵan soń ózine qatysty aitylǵan synnyń kóptigine tańqalǵannyn jazdy. «Qalalyq dýma sailaý týraly bilgem joq. Maǵan tek «qalany quttyqta» dep edi» dedi Gýf.
Keibir qoldanýshylar kliptegi Máskeý kórinisterin biyl qalada ótken narazylyq kadrlarymen almastyryp qoiǵan.
Reper Timati Resei prezidenti Vladimir Pýtindi qoldaidy. 2012 jyly ótken prezident sailaýynda reper «Nege men Pýtinge daýys beremin?» roligine túsken. 2018 jylǵy sailaýda Timati Pýtinniń senimdi ókili boldy.
Eki reperdiń klipi 8 qyrkúeiekte ótken Máskeý qalalyq dýmasy sailaýynyń qarsańynda jariialandy. Sailaý komissiiasynyń táýelsiz saiasatkerlerdi kandidat retinde tirkemei qoiýy sońǵy jyldardaǵy eń aýqymdy narazylyq aktsiialaryna ulasqan. Bir aidan astam ýaqyt aralyǵynda shamamen úsh myńǵa jýyq adam ustalǵan. Politsiia narazylyq bildirgenderdi kúshpen ustap, ondaǵan adamdy jazalady. Máskeýdiń narazylarǵa tanytqan reaktsiiasyn halyqaralyq uiymdar synǵa alǵan.
