Halyqaralyq olimpiada komiteti (HOK) sprinter Kristina Timanovskaiany Tokio Olimpiadasynan eline kúshpen qaitarýǵa tyrysty dep aiyptalǵan eki belorýs trenerin akkreditatsiiadan aiyrdy.
HOK 6 tamyzda Twitter-de taratqan habarlamasynda "Tokioda áli óner kórsetip jatqan belorýs sportshylarynyń múddesi úshin" osyndai qadamǵa baryp otyrǵanyn jazdy.
Aqparatqa qaraǵanda, HOK belorýs trenerleri Artýr Shýmak jáne Iýrii Maisevichten Olimpiada qalashyǵynan tez arada ketýdi talap etken jáne olar talapty oryndaǵan. Timanovskaiamen bolǵan oqiǵany anyqtaý úshin HOK tártiptik komissiia qurǵan. Komissiia Shýman men Maisevichtiń sportshyǵa "qysymyn" da zertteýi tiis.
"Olarǵa óz pikirin aitýǵa múmkindik beriledi" delingen málimdemede.
Qazir Varshavada júrgen Timanovskaianyń sózine qaraǵanda, ol trenerlerdiń Belarýske oralý týraly buiryǵyn oryndaýdan bas tartqan. Timanovskaia áleýmettik jelide Belarýstiń sport sheneýnikterin synap jazǵany úshin qýdalaýǵa ushyraimyn ba dep qoryqqan.
24 jastaǵy sportshy poliak diplomattarynyń qorǵaýymen Varshavaǵa jetken. Jaqyn arada bosqyn mártebesin berý jóninde ótinish túsiredi. 5 tamyz kúngi baspasóz jiynynda Timanovskaia Polshaǵa kómegi úshin alǵys aityp, "qaýipsiz bolǵan kezde" Belarýske oralýdan úmitti ekenin jetkizdi.
