Qazaqstan Respýblikasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasynda memlekettik tildi úiretý úderisine jańa aqparattyq tehnologiialardy engizý qajettigi basa kórsetilgen bolatyn. «Til álemi» portalynyń «Atau.kz» onomastikalyq, «Emle.kz» orfografiialyq, «Termincom.kz» terminologiialyq saitynyń iske qosylýy internet keńistigindegi tildik kontenttiń kóbeiýine, memlekettik tildi qashyqtan úirenýshiler qatarynyń ósýine múmkindik jasaidy.
«Til álemi» portaly tildiń áleýmettik, qoǵamdyq qubylys retindegi qyzmetin meilinshe tolyq qamtidy. Portaldyń mazmuny qoǵamdaǵy tildik suranystarǵa orai 1)Tuǵyr; 2)Aqparat; 3)Ádis; 4)Til raiy; 5)Tartý; 6)Tolǵanys; 7) Orta taqyrybyndaǵy 7 blokqa toptastyryldy.
«Tuǵyr» blogy «Basqy bet» qyzmetin atqarady. Munda portaldyń qurylym ataýlary, basqa saittarǵa siltemeler ornalastyrylǵan. Til jańalyqtary, Ministrlik, Komitet tarapynan júrgizilip jatqan jumystar jóninde habarlar «Aqparat» blogynda berilse, «Ádis» blogynda qazaq, orys jáne aǵylshyn tilderin oqytýǵa arnalǵan ádistemelik eńbekter ornalastyryldy. Bloktyń «Ǵalymnan keńes», «Ádiskerge kómek» modýlderi arqyly árbir qoldanýshy jalpy tilge jáne til úirenýge qatysty kásibi, ǵylymi, ádistemelik kómek alady.
«Tartý» blogynan Komitettiń tapsyrysy boiynsha shyǵarylyp jatqan baspa ónimderiniń jáne «Til jáne qoǵam», «Týǵan til» almanahtarynyń, «Balapan álemi» jýrnalynyń, «Onomastikalyq habarshy», «Terminologiialyq habarshy» biýlletenderiniń elektrondy nusqalaryn da oqýǵa bolady.
«Til raiy» blogy memlekettik tilde jarnama mátinderindegi qatelerge, tele jáne radio tilshileriniń sóz qoldanysyndaǵy olqylyqtarǵa nazar aýdaryp, olardy túzetýge, tildik normalardy saqtaýǵa baǵyttalǵan.
Al «Tolǵanys» blogynda memlekettik til taqyrybyndaǵy ǵylymi, ǵylymi-kópshilik, pýblitsistikalyq maqalalar, portaldy qoldanýshylar tarapynan usynylatyn oi-pikirler, usynystar oryn alsa, «Orta» blogynda portal týraly aqparat, bailanys, mekenjai kartasy, negizgi bloktarda kórsetilgen jobalarǵa tikelei kirýge múmkindik alý úshin taqyryptyq animatsiialyq qiyndylar ornalastyrylǵan.
«Termincom.kz» elektrondyq saity «Bekitilgen terminder», «Terminder hronologiiasy», «Qoldanystaǵy salalyq terminder», «Oitalqy», «Quqyqtyq-normativtik baza», «Ǵylymi-ádictemelik negizder» jáne «Izdeý» bloktarynan turady. «Bekitilgen terminder» blogynda Respýblikalyq terminologiialyq komissiiasynda maquldanǵan terminder ornalastyrylsa, «Terminder hronologiiasynda» terminderdiń bekitilý merzimderi jáne olardyń sózdik retinde jaryq kórýinen málimetter beriledi. «Qoldanystaǵy salalyq terminder» blogynda Respýblikalyq terminologiia komissiiasynyń maquldaýymen jaryq kórgen terminologiialyq sózdikter salyndy. «Oitalqy» aidarynda bekitýge usynylatyn terminderge qatysty árbir oqyrman óz oi-pikirin qaldyra alady. «Ǵylymi-ádistemelik negizder» blogynda terminjasam máselelerine qatysty eńbekter usynylyp otyr.
«Atau.kz» onomastikalyq elektrondyq saity «Quqyqtyq-normativtik baza», «Ǵylymi-tájiribelik negizder» jáne «Izdeý» bloktarynan turady. «Quqyqtyq-normativtik bazada» salaǵa qatysty quqyqtyq negizdegi qujattar toptastyrylǵan. «Ǵylymi-tájiribelik negizderi» blogynda onomastikalyq ataýlardyń tarihy, etimologiiasy, jasalý erekshelikteri týraly tanymdyq sipattaǵy ǵylymi jáne ǵylymi-kópshilik, anyqtamalyq ádebietter men maqalalar usynylady. «Izdeý» blogy arqyly atalǵan qordy paidalanýshy ózine qajetti onomastikalyq aqparatty terip, suranysyn qanaǵattandyrady.
«Emle.kz» saity qazaqsha durys jazý, sózdi durys aitý, jurtshylyqtyń til mádenietin kóterý maqsatynda quryldy. Saittyń «Ádebi til normalary» blogynda sóz sazy, onyń kórkem ádebiet pen ómirdegi mańyzy, erejeleri men qaǵidalary berilse, «Orfografiia» blogynda sózderdiń durys jazylý erejeleri beriledi. Sondai-aq kirme sózder men termindik mánge ie sózderdiń burynǵy jáne qazirgi jazylý barysyndaǵy aiyrmashylyqtary salystyrmaly túrde kórsetiledi. «Pýnktýatsiia» blogynda tynys belgilerdiń qoiylý retine bailanysty erejeler engizilse, «Abbreviatýra» blogynda qysqarǵan sózder, olardyń tolyq ataýlary, qysqarylý reti, ataýlar men sózderdi qysqartý barysynda basshylyqqa alynatyn qaǵidalar men súienetin zańdylyqtar keltiriledi. «Maqalalar» blogynda ǵalymdardyń osy sala negizinde jazylǵan ǵylymi maqalalary beriledi. Árbir maqaladan keiin pikir qaldyratyn oryn bolady. Sol arqyly oqyrman avtordyń ózine, maqalasyna qatysty suraqtar qoiyp, jaýap alady. Oqyrman onlain rejiminde orfografiiaǵa qatysty týyndaǵan suraqtaryn qoia alady. Árbir qoiylǵan suraqqa bilikti mamandardyń kómegimen tolyqqandy jaýap beriledi.
Bul jobalardyń iske qosylýy memlekettik tildiń qoldanylý aiasyn keńeitýge, til úiretýdiń tiimdi ádisterin taratýǵa qolaily jaǵdai jasaidy. Portal men saitty tutynýshy til biliminiń kez kelgen salasy boiynsha týyndaǵan suraqtaryna jaýap alý múmkindigine ie bolady. Til máselesine qatysty ǵylymi eńbekter men maqalalardyń, sirek kezdesetin kórkem jáne ádistemelik ádebietterdiń qol jetimdiligi, kei tartysty saýaldarǵa mamandar tarapynan berilgen tolyqqandy jaýap azamattardyń til mádenietin kóterip, tildik saýattylyǵyn arttyrary sózsiz.
