Qazaqstan Respýblikasy Mádeniet jáne sport ministrligi Tilderdi damytý jáne qoǵamdyq-saiasi jumys komitetiniń tapsyrmasymen «Sh.Shaiahmetov atyndaǵy tilderdi damytýdyń respýblikalyq úilestirý-ádistemelik ortalyǵy» etnos jastary arasyndaǵy qazaq tili bilgirleriniń "Til parasat" respýblikalyq baiqaýyn ótkizdi.
Baiqaý memlekettik tildiń qoldanylý aiasyn keńeitý, til mádenietin kóterý, etnos ókilderin yntalandyrý, talantty jastardy anyqtaý jáne qoldaý maqsatynda uiymdastyryldy. Aýqymdy sharaǵa 17-22 jas aralyǵyndaǵy oblystyq jáne qalalyq irikteý kezeńderiniń júldegerleri qatysty. Olar baiqaý erejesine sai birinshi kezeńde usynylǵan taqyryp boiynsha aýyzsha tanystyrylym jasady. Ekinshi ainalymda qazaqsha esse jazdy. Úshinshi kezeń dialog qurýǵa negizdelse, sońǵy saiysta "shabytty juldyz" taqyryby aiasynda shyǵarmashylyq múmkindikterin kórsetti.
Qatysýshylardyń bilimi men biligin, óneri men óresin belgili filolog ǵalymdardan quralǵan qazylar alqasy baǵalady. Olardyń qatarynda filologiia ǵylymdarynyń doktory, professor Temirhan Tebegenov, Sh. Shaiahmetov atyndaǵy respýblikalyq úilestirý-ádistemelik ortalyǵy direktorynyń orynbasary Orazkúl Asanǵazy, A. Baitursynuly atyndaǵy Til bilimi institýtynyń bólim meńgerýshisi, filologiia ǵylymdarynyń doktory Orynai Jubaeva, Qazaq ulttyq salt-dástúrleri akademiiasynyń professory, kompozitor Kentaý Qýantaiuly jáne qazaqstandyq Ulttyq IýNESKO klýbtary Federatsiiasynyń vitse-prezidenti Ǵani Beisembaev bar.
– Elimiz táýelsiz el atanǵanyna jiyrma alty jyldyń júzi boldy. Osy jyldar aralyǵynda Qazaqstan ótpeli kezeńdi basynan ótkergeni barlyǵymyzǵa belgili. Táýelsizdik jyldarynda eń kóp aitylǵan hám jazylǵan taqyryptyń biri – memlekettik tildiń ahýaly. Dese de Keńes Odaǵy tusyndaǵy jaǵdaiǵa qaraǵanda shúkirshilik aitarlyqtai. Bul tarapta birqatar sharýa atqarylyp, naqty bastamalar qolǵa alyndy. Istelgen jumystar da jeterlik. Memlekettik tilimizdiń mártebeli tuǵyryna tolyq qonýy úshin bizdiń ortalyq ta aianyp qalmai, júieli jumystar júrgizýde. Bul is-shara da sonyń bir parasy, – dedi O. Asanǵazy.
Arnaiy qurylǵan komissiia sheshimimen bas júlde Atyraý oblysy №16 Qarajigitov atyndaǵy mektep-litseidiń 11-synyp oqýshysy Angelina Kimge buiyrdy. Júldeli I oryndy Mańǵystaý oblysy Beineý aýdany Ústirt orta mektebiniń muǵalimi Irina Silchenko ielendi. Al II oryndy Batys Qazaqstan innovatsiialyq tehnologiialyq ýniverstitetiniń 2-kýrs stýdenti Elena Polfýntikova enshilese, úzdikter qataryn Karina Stoliarova (Jambyl oblysy Talas aýdany 11-synyp oqýshysy) men Laila Ordabekova (Almaty qalasy Qazaq memlekettik qyzdar pedagogika ýniversitetiniń 2-kýrs stýdenti) tolyqtyrdy.
Baiqaý barysynda belsendiligimen kózge túsken Qaraǵandy oblysy tehnologiia kolledjiniń 4-kýrs stýdenti Rýslan Panishev pen Shyǵys Qazaqstan oblysynyń Serikbaev atyndaǵy ShQMTÝ 2-kýrs stýdenti Anna Razdomina alǵyshatpen marapattalyp, yntalandyrý syilyǵyn iemdendi.
Barlyq baiqaý qatysýshylaryna alǵyshat tabystalsa, júldegerler arnaiy diplom men qomaqty qarjylai syilyqqa qol jetkizdi.
