Til komiteti zań buzýshylarmen belsendi kúresti bastady. Bul týraly áleýmettik jelide QR Mádeniet jáne sport ministrligi Til saiasaty komitetiniń tóraǵasy Ədilbek Qaba jazdy, dep habarlaidy "Ult aqparat".
«Talap kúsheidi.Til qorǵandary barlyq aimaqtarda Til basqarmalarymen birlesip qazaq tiline qatysty zańnama talaptarynyń buzylýyna jol bermeý úshin belsendi kúresti bastady. Memlekettik tildiń tazalyǵyn, ultaralyq qatynas tiline ainalýyn talap etýshilerdiń qatarynda qazaqsha jaqsy sóileitin orys jáne ózge ult ókilderi júrgeni – qazaq tiliniń ultty uiystyrýshy rólin atqara bastaǵanyn baiqatady», - dedi Á. Qaba.
Osy oraida ol atqarylyp jatqan jumystarǵa toqtaldy.
Birinshi, «Til qorǵandary» onlain eriktiler jumys tobynyń Jadynamasy jasaldy. Ol zańgerlermen jan-jaqty talqylandy. Sóitip, Til komiteti aimaqtardaǵy oblys, qala, tipti aýdan deńgeiine deiingi Til basqarmalarynyń basyn qosyp, Jadynamany tanystyrdy. Ol áleýmettik jelilerdegi akkaýnttar arqyly da tanystyrylatyn bolady.
«Ekinshi, osy Jadynama tanystyrylǵan jiynda barlyq aimaqtardaǵy Til basqarmalary qoǵam belsendilerin tarta otyryp, til zańnamalary talaptarynyń buzylýyn tekserýdi belsendi júrgizý maqsaty qoiylǵan bolatyn. Osy apta ishinde Almaty qalasynda, Atyraý, Jambyl, Qaraǵandy obylystarynda, basqa da óńirlerde belsendi tekserýler júrgizildi. Tekserý nátijesinde kóptegen zań buzýshylyqtar anyqtalyp, eskertýler jasaldy, hattama toltyryldy, túsindirý jumystary júrgizildi.
Úshinshi, «TIL QORǴANY» telebaǵdarlamasy ashylyp, búkil respýblika boiynsha reidterden reportajdar jasaýy úshin arnaiy keste jasaldy. Sondai-aq ár oblysta osy tárizdi til máselelerin ótkir kóteretin telebaǵdarlama uiymdastyrý máselesi qoiyldy», - dep jazdy komitet tóraǵasy.
«Til qorǵany» baǵdarlamasy «Almaty» telearnasynan kórsetiledi.
«Tórtinshi, elimizdegi barlyq mýlfilm jasaityn kompaniia basshylaryn jinap, «Nelikten elimizde qazaq tilindegi animatsiialyq filmder az?» degen taqyrypta kezdesý ótkizdim. Munda da másele óte kóp. Ol týraly jazdym. Bul salaǵa memleket erekshe kóńil bólip, aiamai aqsha jumsamasa balalarymyzdyń tili besikten-aq oryssha shyǵatyn bolady. Osy jáne basqa da máselelerin jinaqtap, olardyń pikir-usynystary negizinde Hattama qabyldap, quzyrly ministrlikterge jiberdik», - dedi Ádilbek Qaba.
Besinshi, elimizdegi tanymal jas aqyn, jazýshylarmen kezdesý ótkizildi. Qazaq tilindegi balalar ádebietin kóterý, jalpy jas jazýshylardyń shyǵarmashylyǵy men túiini sheshilmei jatqan máseleleri talqylandy. Jas jazýshylar da pikirlerin aityp, usynystaryn berdi.
«Altynshy, TIL QORǴANDARY onlain eriktiler tobynyń jumysy belsendi júre bastady. Top músheleri ár aimaqtan ózderi kórgen saýatsyz jarnamalardy, qate mańdaishalar men japsyrmalardy sýretke, videoǵa túsirip Toptyń telegram, instaggram, feisbýk jelilerindegi akaýnttaryna jiberip jatyr. Til komiteti bul derekterdi qarap, óńirlerdegi til basqarmalaryna, ákimder men biznes salasy basshylaryna talap hat joldady...», - dedi komitet basshysy.
