Qazaqstanda kásipkerdiń qazaq tili jaiynda aitqany daýǵa ainalyp, qoldanýshylar kásipkerdiń kompaniiasyna boikot jariialaýdy usyna bastaǵannan keiin 20 qazanda kompaniia oqiǵaǵa túsinikteme berdi. Olar kásipkerdiń "qateleskenin" aityp, qazaq tilindegi nusqasy joq saittaryn qazaqshalaýǵa da ýáde berdi, dep habarlaidy Azattyq.
Bir kún buryn Chocofamily Holding negizin qalaýshy qazaqstandyq kásipker Ramil Mýhoriapov elge kelgen reseilikter aldynda sóilegen sózinde Qazaqstanda "orys tilin bile tura" qazaq tilinde sóilegenderdi synap, muny "ultshyldyq pen mádenietsizdiktiń belgisi" dep ataǵan. Kásipker sózin jeli qoldanýshylary qatań synǵa alyp, kompaniianyń qyzmetin paidalanýdan bas tartý naýqany da bastalǵan. Keibir qoldanýshylar kompaniia saittarynyń qazaqsha nusqasynyń joǵyna da nazar aýdarǵan.
– Bul - bizdiń kemshilik. Munymyzdy aqtai da ala almaimyz. "Ýaqyt bolmady, úlgere almadyq" dep te aita almaimyz. Aitqandaryńyzdyń bári durys. Endi bizdiń qolymyzdan ne keledi? Túzeý kerek. Sońǵy birneshe aida sol boiynsha jumys istep jatyrmyz. Sol sebepti jyl sońyna deiin barlyq servis qazaq tiline aýdarylady dep oilaimyn. Túzeýge ýáde beremiz, – dedi 20 qazanda aqparat quraldaryna túsinikteme bergen Chocofood kompaniiasynyń PR menedjeri Sániia Serikova.
Aqparat quraldary odan Ramil Mýhoriapovtyń sózi jóninde de surady.
– Ramil qatelesti. Durys sóz tańdai almai qatelesti. Barlyǵy muny túsinedi. Sebebi eger ol solai oilasa, (qanshama qazaq otyr – S.S), qazaqtar onymen jumys istemeitin edi. Qazir ol shyn júregimmen keshirim suraǵan video túsirip jatyr. Ol óziniń Instagramdaǵy paraqshasyna jariialaidy. Tek osyndǵaylar ǵana emes, bári kóre alýy úshin, – dedi Sániia Serikova.
Beisenbi kúni kompaniia ókili aqparat quraldaryna suhbat bermei turyp, belsendi Kámila Eńsegenova Chocofood-tyń Almatydaǵy keńsesine baryp, kásipkermen kezdesýdi talap etken edi. Onyń qolynda "Qazaqstanda oryssha sóileýge mindetti emespin. #Sancel Chocolife, #Ramilge boikot" degen jazýy bar plakat boldy.
– Qazaqtar "ultshyl" dedi. Oryssha bilmeitin qazaqtar "birtúrli", "mádenietsiz" dedi. Men - mádenietsiz emespin. Men mádenietsiz bolsam, basqa jerge barar edim. Ramil myrzamen kózbe-kóz sóilesýge keldim, – dedi kásipkerdiń shyǵýyn talap etken belsendi. Oqiǵa ornynda belsendimen qatar aqparat quraldary boldy. Alaida kásipker shyqqan joq. Onyń ornyna kompaniia ókili Sániia Serikova jaýap bergen.
Byltyrdan beri Resei saiasatkerleri men aqparat quraldary Qazaqstannyń aýmaqtyq tutastyǵyna, eldegi orys tiliniń ahýalyna qatysty qarama-qaishy málimdemeler jasap júr. Keibirine Qazaqstan biligi reaktsiia da bildirgen. Qyrkúiek sońynan beri mobilizatsiiadan qashqan reseilikterdiń edáýir bóligi Qazaqstanǵa kelgennen keiin elde til máselesi de jii kóterilip júr.
Chocofamily Holding negizin qalaýshy, 37 jastaǵy Ramil Mýhoriapov Forbes málimetinshe, 2021 jyly Qazaqstandaǵy eń yqpaldy 50 kásipker qataryna engen. Maýsym aiynda ol "Otbasy bank" (burynǵy "Turǵyn úi qurylys jinaq banki") AQ direktorlar keńesiniń quramyna kirgen.
