Foto: pixabay.com
Mádeniet jáne aqparat ministri Aida Balaeva TikTok-ta betin tumshalap alyp kontent taratatyndardyń áreketi týraly pikir bildirdi, dep habarlaidy Kazinform.
Májilistiń jalpy otyrysynan keiin BAQ ókilderi ministrge áleýmettik jeli akkaýnttaryn shekteý beleń alyp jatqanyna alańdaýshylar kóp ekenin aityp, suraq qoidy.
«Bizdiń ministrlik quzyretti organ retinde áleýmettik jelilerge monitoring júrgizedi. Kontentterinde zań buzý faktileri anyqtalsa, ony quqyq qorǵaý organdaryna jiberemiz. Quqyq qorǵaý organdary ol kontenttiń zańǵa qanshalyqty sáikes ekenin anyqtap, zań buzǵany dáleldense, is qozǵaýǵa quqyqtary bar. Jyl basynan beri ár baǵyttaǵy 800-den astam zań buzý faktisi tirkeldi. Onyń ishinde pornografiialyq mazmundaǵy, esirtki taratýmen bailanysty, iritki salý, jalǵan aqparat siiaqty faktiler bar», - dedi ministr.
Sondai-aq Aida Balaeva áleýmettik jelide betin tumshalap alyp kontent taratatyn qyz-kelinshekterdiń máselesi jeke pysyqtalatynyn aitty.
«Tumshalaný máselesi áli zańmen rettelmegen. Óitkeni ol máseleni biz endi-endi qaraimyz. Depýtattar osy máseleni bizge saýal retinde joldady. Biz ony jan-jaqty zerdelep jatyrmyz. Bul birinshiden, ulttyq qaýipsizdik máselesi ekenin buǵan deiin de aittym», - dedi ministr.
