TikTok Qazaqstanmen yntymaqtastyqty keńeitýge nietti.
Bul týraly Shyǵys Eýropadaǵy TikTok ókildiginiń direktory Oleg Sokolov QR Syrtqy ister ministriniń orynbasary Almas Aidarovpen jáne «Kazakh Invest» UK» AQ ókilderimen kezdesý barysynda habarlady.
2018 jyly iske qosylǵan TikTok halyqaralyq nusqasy – ai saiynǵy álemdik aýditoriiasy milliard paidalanýshydan asatyn jetekshi ǵalamdyq Internet-platformalardyń biri.
TikTok kompaniiasy delegatsiiasynyń elimizge kelý sebebi bilim berý, mádeniet, týrizm salasyndaǵy jobalar jáne Qazaqstan aýmaǵynda platformany damytýdyń basqa da máselelerin talqylaý bolyp tabylady.
TikTok ókilderiniń aqparaty boiynsha, búginde Qazaqstanda tirkelgen 7 millionnan astam paidalanýshy platformany ai saiyn paidalanady. Kompaniia álemniń kóptegen elderinde, sonyń ishinde Qazaqstanda bilim berý jáne mádenietti damytýǵa járdemdesý salasynda aýqymdy jobalardy iske asyrady.
Oleg Sokolov TikTok kompaniiasynyń QR aýmaǵynda ulttyq teatrlar men murajailardy ilgeriletýdi qosa alǵanda, platformanyń mádeni-tanymdyq kontentin kúsheitý jónindegi nietin atap ótti.
Óz kezeginde Almas Aidarov Qazaqstanda kompaniia ókildigin ashý múmkindigin qarastyrýdy usyndy jáne kompaniianyń eldegi bastamalaryna jan-jaqty qoldaý kórsetýge daiyn ekenin habarlady.
Sapar aiasynda, «Kazakh Invest» UK» AQ jáne «Zerde» holdingi AQ uiymdastyrýymen TikTok kompaniiasynyń ókilderi QR MSM, QR AQDM, QR TsDIAÓM, QR BǴM jáne t.b. organdardyń basshylarymen kezdesýler ótkizdi.
Kezdesý qorytyndysy boiynsha taraptar ózara yntymaqtastyqty nyǵaitýǵa kelisti.
