QR Bilim jáne ǵylym ministri Ashat Aimaǵambetov pedagogtardyń Ulttyq biliktilik testin tapsyrý protsesine engizilgen ózgeristerdi baiandady, dep habarlaidy"Ult aqparat".
«Ulttyq biliktilik testin tapsyrý qiyn, onyń qajeti joq» degen pikirdi jii estimin. Búginge deiin synaq tapsyrǵan áriptesterimizdiń 67 paiyzy testileýden ótip, sanattaryn kóterdi. Bul sanattar úshin eńbekaqyny 30-50 paiyzǵa deiin kóterýge bolady. Oǵan deiin joǵary sanat, birinshi sanat úshin muǵalimderge 17 myń teńgeden aspaityn ústemeaqy tólenetin. Iaǵni, jańa júiedegi ústemeaqy aitarlyqtai kóp», - dep atap ótti ministr búgin Ortalyq kommýnikatsiialar qyzmetinde ótken baspasóz máslihatynda.
Sonymen birge, vedomstvo basshysy Ulttyq biliktilik testinde ózekti máselelerdiń bar ekenin de jasyrmady.
«Qazirgi ýaqytta pedagog kezekti sanatty qorǵaý úshin mektep direktoryna ótinish jazýy tiis. Mektep direktory – bilim basqarmasyna, basqarma – ministrlikke júginetin kúrdeli biýrokratiialyq júie paida boldy. Osyǵan bailanysty, kelesi jyly jańa júiege kóshemiz. Onda pedagog Elektrondyq úkimet arqyly testileýge tikelei ótinim bere alady. Jeke kabinetinde test tapsyrýǵa qai kún yńǵaily ekenin kórsete alady», - dedi A. Aimaǵambetov.
Odan bólek, ministrdiń aitýynsha, Ulttyq biliktilik testine keletin muǵalimder egjei-tegjeili tekserilmeidi.
«Testileýge qatysatyn muǵalimderdi tekserý jóninde biraz syn aityldy. Árine, bul protsess júikege tiedi. Sondyqtan áriptesterimizge senim artýdy uiǵardyq. Biylǵy qarasha aiynan bastap, testileýge kelgen pedagogtar tekserilmeidi. Iaǵni eshqandai metall izdegish bolmaidy. Muǵalimder emin-erkin óz ornyna jaiǵasady. Biraq qandai da bir pedagog tyiym salynǵan quralmen, uialy telefonmen kózge tússe, onyń qoldaný-qoldanbaýyna qaramastan, test nátijesi joiylady», - dep eskertti Bilim jáne ǵylym ministri.
