Ulttyq testileý ortalyǵy búgin Almatydaǵy jekemenshik oqý oryndarynyń birinde testileý kezinde bolǵan qaiǵyly oqiǵadan keiin túsinik berdi, dep habarlaidy QazAqparat.
«Búgin, 14 sáýirde Almatydaǵy jekemenshik mektepterdiń birinde 1973 jyly týǵan muǵalim testileý kezinde qaitys boldy. Er adam gipertenziialyq (gipertoniialyq) aýrýyna bailanysty emhanada esepte turǵan. Qazirgi ýaqytta sot-meditsinalyq saraptama júrgizilip jatyr» delingen habarlamada.
Muǵalimder ulttyq biliktilik testin 2018 jyldan beri tapsyryp keledi. Ortalyq aqparaty boiynsha, bul - osy 4 jyldaǵy alǵashqy qaiǵyly jaǵdai. Testileý ortalyqtarynda alǵashqy kómek kórsetý úshin dárigerlerdiń jumysyn baqylaý kúsheitilmek.
«Bekitilgen sanatyna bailanysty 230 myńnan astam adam jyl saiyn jalaqysynyń 30-50% mólsherinde qosymsha tólemder alady. Osy rette attestatsiianyń ózi erikti sipatqa ie ekenin atap ótemiz. Pedagogter jalaqylaryna taǵy qosymsha aqy alý úshin testileýge jazylyp, osy protsedýradan ótedi. Eger test tapsyrýshy ózin nashar sezinse, testileý kúnin ózgertý múmkindigi beriledi», - dep habarlady Ulttyq testileý ortalyǵy.
Sondai-aq, Almaty qalalyq bilim basqarmasy marqumnyń otbasyna kóńil aitqany, barlyq qajetti kómek kórsetiletini málimdengen.
