Ishki ister ministri Marat Ahmetjanov kazinoǵa barǵan quqyq qorǵaý organdarynyń 97 qyzmetkerine qatysty tergeý júrip jatqanyn aitty, dep habarlaidy Sputnik Qazaqstan.
"Bul - memlekettik qyzmetshilerdiń, sonyń ishinde quqyq qorǵaý organdary qyzmetkerleriniń ádep kodeksi ǵoi. Árbirine ádil baǵa beriledi. Bul tulǵalar boiynsha tergeý júrip jatyr. Keibiri IIM qurylymynda shynymen de jumys istemeidi", - dedi Ahmetjanov adam saýdasyna qarsy is-qimyl týraly forýmnyń kýlýarynda.
IIM basshysy sheneýnikterdiń qumar oiyndarǵa aqshany qaidan alǵany tergeý barysynda anyqtalatynyn málimdedi.
Sondai-aq Memlekettik qyzmet isteri agenttigi de memlekettik qyzmetshilerdiń qumar oiyndarǵa qatysý faktisi boiynsha tekseris júrgizilip jatqanyn habarlady.
Memlekettik qyzmetshiler tarapynan zańbuzýshylyq anyqtalǵan jaǵdaida naqty sharalar qoldanylady.
"Memlekettik qyzmetshilerdiń moraldyq-ádeptilik beinesine qoiylatyn talaptar Qazaqstan memlekettik qyzmetshileriniń ádep kodeksinde aiqyndalǵan. Kodekske sáikes memlekettik qyzmetshiler óz qyzmetinde memlekettik biliktiń bedeline jáne memlekettik qyzmetke kir keltiretin áreketterge barmai, kez kelgen jaǵdaida ádep normalaryn saqtap, birinshi kezekte eldiń, memlekettiń múddesine qyzmet etýge tiis", - delingen habarlamada.
Eske salsaq, buǵan deiin jelide Almaty oblysy prokýratýrasy júrgizgen tekseristiń nátijesi jariialandy. Onda kazinoǵa jii baryp turatyn 300-den astam memlekettik qyzmetshi týraly aitylǵan.
Túrli memlekettik organdardyń 305 qyzmetkeri qumar oiyndarǵa 507 mln teńge jumsaǵan. Olardyń arasynda ishki ister ministrliginiń - 97, qorǵanys ministrliginiń - 95, qarjy ministrliginiń - 25, sondai-aq Antikor, Joǵarǵy sot pen ákimdikterdiń qyzmetkerleri bar.
