Foto: ktf.kz
Prosteev qalasynda (Chehiia) 14 jasqa deiingiler arasynda ótip jatqan komandalyq álem chempionatynyń (2022 ITF World Junior Tennis Finals) shirek finalynda qazaqstandyq jasóspirimder Sloveniia quramasymen oinaidy, dep habarlaidy QazAqparat.
Qazaqstan tennis federatsiiasynan málim etkenindei, Sloveniiamen match 4 tamyz kúni elorda ýaqyty boiynsha shamamen 14:00-de bastalady.
Qazaqstan quramasynyń kapitany Sergei Kvaktyń aitýynsha, qazaqstandyq jasóspirimder álem chempionaty barysynda tabysty óner kórsetip keledi.
«Men óz shákirtterimmen maqtanamyn. Ekvadormen oiyn álem chempionatyndaǵy alǵashqy match bolǵandyqtan, qazaqstandyq jasóspirimder tolqýdy bastan keshirip, ese jiberip aldy. Sodan keiin Argentina men Italiia siiaqty asa myqty komandalardy utyp, shirek finalǵa joldama aldy. Bul – tarihi jeńis», - dedi S. Kvak.
Eske sala keteiik, budan buryn tennisten álem chempionatynda qazaqstandyq jasóspirimderdiń alǵash ret shirek finalǵa shyqqanyn jazǵan bolatynbyz.
Toptyq básekede Italiiamen ótken matchta Sergei Kvaktyń shákirtteri álem chempiondaryn 3:0 esebimen tize búktirdi. Úshinshi, juptyq kezdesýde Damir Jalǵasbai men Daniel Tazabekov qarsylastarynan 6:1, 6:3 esebimen basym tústi.
