فوتو: ktf.kz
پروستەەۆ قالاسىندا (چەحييا) 14 جاسقا دەيٸنگٸلەر اراسىندا ٶتٸپ جاتقان كوماندالىق ەلەم چەمپيوناتىنىڭ (2022 ITF World Junior Tennis Finals) شيرەك فينالىندا قازاقستاندىق جاسٶسپٸرٸمدەر سلوۆەنييا قۇراماسىمەن وينايدى, دەپ حابارلايدى قازاقپارات.
قازاقستان تەننيس فەدەراتسيياسىنان مەلٸم ەتكەنٸندەي, سلوۆەنييامەن ماتچ 4 تامىز كٷنٸ ەلوردا ۋاقىتى بويىنشا شامامەن 14:00-دە باستالادى.
قازاقستان قۇراماسىنىڭ كاپيتانى سەرگەي كۆاكتىڭ ايتۋىنشا, قازاقستاندىق جاسٶسپٸرٸمدەر ەلەم چەمپيوناتى بارىسىندا تابىستى ٶنەر كٶرسەتٸپ كەلەدٸ.
«مەن ٶز شەكٸرتتەرٸممەن ماقتانامىن. ەكۆادورمەن ويىن ەلەم چەمپيوناتىنداعى العاشقى ماتچ بولعاندىقتان, قازاقستاندىق جاسٶسپٸرٸمدەر تولقۋدى باستان كەشٸرٸپ, ەسە جٸبەرٸپ الدى. سودان كەيٸن ارگەنتينا مەن يتالييا سيياقتى اسا مىقتى كوماندالاردى ۇتىپ, شيرەك فينالعا جولداما الدى. بۇل – تاريحي جەڭٸس», - دەدٸ س. كۆاك.
ەسكە سالا كەتەيٸك, بۇدان بۇرىن تەننيستەن ەلەم چەمپيوناتىندا قازاقستاندىق جاسٶسپٸرٸمدەردٸڭ العاش رەت شيرەك فينالعا شىققانىن جازعان بولاتىنبىز.
توپتىق بەسەكەدە يتالييامەن ٶتكەن ماتچتا سەرگەي كۆاكتىڭ شەكٸرتتەرٸ ەلەم چەمپيوندارىن 3:0 ەسەبٸمەن تٸزە بٷكتٸردٸ. ٷشٸنشٸ, جۇپتىق كەزدەسۋدە دامير جالعاسباي مەن دانيەل تازابەكوۆ قارسىلاستارىنان 6:1, 6:3 ەسەبٸمەن باسىم تٷستٸ.
