Qazaqstandyq Elena Rybakina Qytaidaǵy Gýanjchoý WTA týrniriniń ekinshi ainalymyna óte almady, dep habarlaidy "Ult aqparat".
E.Rybakina alǵashqy ainalymda osy týrnirdiń besinshi, álemniń 38-raketkasy, chehiialyq Katerina Siniakovamen kúsh synasty.
Ótken aptada Qytaidaǵy Nanchan jarysynyń finalyna deiin jetken qazaqstandyq tennisshi keshe dúniejúzilik reitingte 69-dan 49-orynǵa kóterilip, óz sporttyq jolynda alǵash ret úzdik elý tennisshiniń qataryna qosylǵan edi.
Bul joly birinshi partiiada chehiialyq sportshy aiqyn basymdyq kórsetti – 6:1.
Ekinshi setti E.Rybakina breikpen bastaǵanymen, óz geimin berip qoidy – 1:1. Esep qarsylasynyń paidasynda 3:1 bolǵannan keiin E.Rybakina básekeni jalǵastyrýdan bas tartty.
K.Siniakova júlde qory 500 myń AQSh dollary bolatyn dodanyń ekinshi ainalymynda álemniń 73-raketkasy, shveitsariialyq Viktoriia Golýbichpen sheberlik baiqasady. V.Golýbichti Nanchan týrniriniń shirek finalynda E.Rybakina jeńgen bolatyn.
Eske sala keteiik, budan buryn Zarina Diiastyń Osaka jarysyn jeńispen bastaǵanyn, Iýliia Pýtintsevanyń ekinshi ainalymǵa shyqqanyn, Mihail Kýkýshkinniń Sankt-Peterborda sátti óner kórsetkenin jazǵan bolatynbyz.
