Qazaqstandyq tennisshilerdiń US Open týrnirindegi qarsylastary anyqtaldy, dep habarlaidy QazAqparat.
Biylǵy «Úlken dýlyǵa» týrniriniń sońǵysy – AQSh-tyń ashyq chempionaty 26 tamyz – 8 qyrkúiek aralyǵynda ótedi.
Áielder arasynda Qazaqstannyń birinshi, álemniń 39-raketkasy Iýliia Pýtintseva alǵashqy ainalymda reitingte 78-orynda turǵan amerikalyq Medison Brenglmen kúsh synasady.
Taǵy bir qazaqstandyq, reitingte 77-satydaǵy Zarina Diiasqa jerebe joldas bola qoiǵan joq. Ol álemniń 2-raketkasy, aýstraliialyq Eshli Bartimen sheberlik baiqasady. Zarinaǵa ótken jyly da myqty qarsylastyń biri, álemniń sol kezdegi segizinshi (qazir úshinshi) raketkasy, chehiialyq Karolina Plishkova tap bolyp, alǵashqy ainalymnan asa almaǵan edi. Al Iu.Pýtintseva birinshi kezdesýinde amerikalyq Bernarda Peradan jeńilgen bolatyn.
Biylǵy US Open dodasyna taǵy bir qazaqstandyq sportshy qosylýy múmkin. Dúniejúzilik reitingte 67-orynda turǵan Elena Rybakina búgin irikteý saiystarynyń finalynda aýstraliialyq, álemniń 190-raketkasy Lizett Kabreramen negizgi týrnirdiń joldamasyn sarapqa salady.
Erler arasynda Qazaqstannyń birinshi, álemniń 44-raketkasy Mihail Kýkýshkinniń alǵashqy ainalymdaǵy qarsylasy osal emes. Ol álemniń 10-raketkasy, ispaniialyq Roberto Baýtista-Agýtpen kortqa shyǵady. Ótken jyly osy jarysta úshinshi ainalymǵa deiin jetken M.Kýkýshkinge biyl sol nátijesin qaitalaý qiynǵa soqpaq.
Taǵy bir qazaqstandyq, reitingte 75-orynda turǵan Aleksandr Býbliktiń qarsylasy irikteý saiystarynyń qorytyndysy shyqqannan keiin anyqtalady.
Bir aita ketetin jait, biyl US Open týrniriniń jalpy júlde qory kóbeitilip, 57 mln AQSh dollaryna jetkizildi. Áielder jáne erler arasynda jeńimpaz atanǵandardyń árqaisysy 3,85 mln dollar tabys tabady, bul ótken jylǵydan 50 myń dollarǵa kóp. Birinshi ainalymnan asa almaǵan tennisshilerdiń ózi 58 myń AQSh dollaryna ie bolady.
Eske sala keteiik, budan buryn E.Rybakinanyń US Open týrniriniń irikteý saiysynyń finalyna shyqqanyn jazǵan bolatynbyz.
