قازاقستاندىق تەننيسشٸلەردٸڭ US Open تۋرنيرٸندەگٸ قارسىلاستارى انىقتالدى, دەپ حابارلايدى قازاقپارات.
بيىلعى «ٷلكەن دۋلىعا» تۋرنيرٸنٸڭ سوڭعىسى – اقش-تىڭ اشىق چەمپيوناتى 26 تامىز – 8 قىركٷيەك ارالىعىندا ٶتەدٸ.
ەيەلدەر اراسىندا قازاقستاننىڭ بٸرٸنشٸ, ەلەمنٸڭ 39-راكەتكاسى يۋلييا پۋتينتسەۆا العاشقى اينالىمدا رەيتينگتە 78-ورىندا تۇرعان امەريكالىق مەديسون برەنگلمەن كٷش سىناسادى.
تاعى بٸر قازاقستاندىق, رەيتينگتە 77-ساتىداعى زارينا ديياسقا جەرەبە جولداس بولا قويعان جوق. ول ەلەمنٸڭ 2-راكەتكاسى, اۋسترالييالىق ەشلي بارتيمەن شەبەرلٸك بايقاسادى. زاريناعا ٶتكەن جىلى دا مىقتى قارسىلاستىڭ بٸرٸ, ەلەمنٸڭ سول كەزدەگٸ سەگٸزٸنشٸ (قازٸر ٷشٸنشٸ) راكەتكاسى, چەحييالىق كارولينا پليشكوۆا تاپ بولىپ, العاشقى اينالىمنان اسا الماعان ەدٸ. ال يۋ.پۋتينتسەۆا بٸرٸنشٸ كەزدەسۋٸندە امەريكالىق بەرناردا پەرادان جەڭٸلگەن بولاتىن.
بيىلعى US Open دوداسىنا تاعى بٸر قازاقستاندىق سپورتشى قوسىلۋى مٷمكٸن. دٷنيەجٷزٸلٸك رەيتينگتە 67-ورىندا تۇرعان ەلەنا رىباكينا بٷگٸن ٸرٸكتەۋ سايىستارىنىڭ فينالىندا اۋسترالييالىق, ەلەمنٸڭ 190-راكەتكاسى ليزەتت كابرەرامەن نەگٸزگٸ تۋرنيردٸڭ جولداماسىن ساراپقا سالادى.
ەرلەر اراسىندا قازاقستاننىڭ بٸرٸنشٸ, ەلەمنٸڭ 44-راكەتكاسى ميحايل كۋكۋشكيننٸڭ العاشقى اينالىمداعى قارسىلاسى وسال ەمەس. ول ەلەمنٸڭ 10-راكەتكاسى, يسپانييالىق روبەرتو باۋتيستا-اگۋتپەن كورتقا شىعادى. ٶتكەن جىلى وسى جارىستا ٷشٸنشٸ اينالىمعا دەيٸن جەتكەن م.كۋكۋشكينگە بيىل سول نەتيجەسٸن قايتالاۋ قيىنعا سوقپاق.
تاعى بٸر قازاقستاندىق, رەيتينگتە 75-ورىندا تۇرعان الەكساندر بۋبليكتٸڭ قارسىلاسى ٸرٸكتەۋ سايىستارىنىڭ قورىتىندىسى شىققاننان كەيٸن انىقتالادى.
بٸر ايتا كەتەتٸن جايت, بيىل US Open تۋرنيرٸنٸڭ جالپى جٷلدە قورى كٶبەيتٸلٸپ, 57 ملن اقش دوللارىنا جەتكٸزٸلدٸ. ەيەلدەر جەنە ەرلەر اراسىندا جەڭٸمپاز اتانعانداردىڭ ەرقايسىسى 3,85 ملن دوللار تابىس تابادى, بۇل ٶتكەن جىلعىدان 50 مىڭ دوللارعا كٶپ. بٸرٸنشٸ اينالىمنان اسا الماعان تەننيسشٸلەردٸڭ ٶزٸ 58 مىڭ اقش دوللارىنا يە بولادى.
ەسكە سالا كەتەيٸك, بۇدان بۇرىن ە.رىباكينانىڭ US Open تۋرنيرٸنٸڭ ٸرٸكتەۋ سايىسىنىڭ فينالىنا شىققانىن جازعان بولاتىنبىز.
