Qazaqstandyq Zarina Diias Melbýrnda Aýstraliia ashyq chempionatyn jeńispen bastady, dep habarlaidy "Ult aqparat".
Dúniejúzilik reitingte 81-orynda turǵan Z.Diias alǵashqy ainalymda álemniń 88-raketkasy, sloveniialyq Tamara Zidanshekpen kezdesti.
Budan buryn qarsylastar ózara bir márte sheberlik baiqasyp, onda qazaqstandyq tennisshi jeńiske jetken edi.
Bul joly da Z.Diias oiyn tizginin ýysynan shyǵarǵan joq. Sóitip ol 6:2, 7:5 esebimen jeńiske jetti.
Báseke 1 saǵat 22 minýtqa sozyldy.
Z.Diias ekinshi ainalymda reitingte 63-satydaǵy amerikalyq Bernarda Peramen kúsh synasady. Ol kezinde dúniejúzilik reitingte kósh bastaǵan «Úlken dýlyǵa» týrniriniń úsh dúrkin jeńimpazy, álemniń 25-raketkasy, germaniialyq Anjelika Kerberdi 6:0, 6:4 esebimen utty.
Taǵy bir qazaqstandyq, Qazaqstan áielder quramasynyń kapitany Iaroslava Shvedova álemniń 76-raketkasy, italiialyq Kamila Djordjige 3:6, 3:6 esebimen ese jiberdi.
Bul oiyn 1 saǵat 15 minýtqa sozyldy. Ia.Shvedova K.Djordjiden budan buryn da bir ret jeńilgen bolatyn.
K.Djordji ekinshi ainalymda «Rolan Garros» týrniriniń ótken jylǵy jeńimpazy, Polsha ókili Iga Shventekpen kortqa shyǵady. Ol niderlandylyq Arancha Rýsty 6:1, 6:3 esebimen tize búktirdi.
Budan bir jyl buryn Qazaqstan tarihynda alǵash ret úsh birdei tennisshimiz Aýstraliia ashyq chempionatynyń úshinshi ainalymyna ótken bolatyn.
