Qazaqstandyq Iýliia Pýtintseva US Open týrniriniń tórtinshi ainalymyna shyqty, dep habarlaidy "Ult aqparat".
Álemniń 35-inshi, týrnirdiń 23-raketkasy Iu.Pýtintseva úshinshi ainalymda reitingte 106-orynda turǵan Belarýs ókili Aleksandra Sasnovichpen kezdesti.
Qazaqstandyq sportshy biyl 25-ke tolsa, qarsylasy odan bir jasqa úlken edi.
Birinshi partiiada A.Sasnovich basymdylyq kórsetti – 6:3.
Esesine ekinshi sette qazaqstandyq tennisshi breikpen alǵa shyqty – 3:1. Budan keiin taǵy bir breik jasaǵan ol óz geimderin de bergen joq – 6:2.
Úshinshi, sheshýshi partiiada A.Sasnovich dop bergende, Iu.Pýtintseva 0:40-tan esepti teńestirip, sosyn breik jasai bildi – 2:1. Taǵy bir breik – 4:1. Aqyry matchty taǵy bir breikpen túiindedi – 6:1.
Birshama tartysty ótken báseke týra 2 saǵatqa sozyldy.
Osylaisha Iu.Pýtintseva AQSh-tyń ashyq chempionatynda óziniń sporttyq jolynda alǵash ret tórtinshi ainalymǵa shyqty. Ol endi álemniń 15-inshi, jarystyń 8-raketkasy, 29 jastaǵy tájiribeli tennisshi, horvatiialyq Petra Martichpen sheberlik baiqasady. Ol osy dodada tabysty óner kórsetip, sporttyq jolynda alǵash ret «Úlken dýlyǵa» týrniriniń úshinshi ainalymyna deiin jetken reitingte 102-satydaǵy, 20 jastaǵy reseilik Varvara Grachevany 6:3, 6:3 esebimen tize búktirdi.
