Ispaniianyń Kordova qalasynda Billi Djin King kýbogynyń plei-off kezeńinde Qazaqstan – Argentina matchy bastaldy, dep habarlaidy "Ult aqparat".
Alǵashqy bolyp kortqa Qazaqstannan álemniń 30-raketkasy Iýliia Pýtintseva, Argentinadan dúniejúzilik reitingte 45-orynda turǵan Nadia Podoroska shyqty.
Ótken jyly Rolan Garros týrniriniń jartylai finalyna deiin jetken N.Podoroska sol dodada Iu.Pýtintsevany da utyp ketken bolatyn.
Bul joly birinshi partiiada argentinalyq tennisshi basymdylyq kórsetti – 6:2.
Ekinshisinde qazaqstandyq sportshy ese qaiyrdy – 6:4.
Úshinshi, sheshýshi sette Iu.Pýtintseva qarsylasyna birde-bir geim bergen joq – 6:0.
Báseke eki saǵattai ýaqytqa sozyldy.
Osylaisha N.Podoroskaǵa Parijde ketken esesin qaitarǵan Iýliia Qazaqstandy alǵa shyǵardy. Esep – 1:0.
Búgin sondai-aq Qazaqstannyń birinshi, álemniń 23-raketkasy Elena Rybakina argentinalyq Mariia Lýrdes Karlemen sheberlik baiqasady.
Senbi kúni N.Podoroska – E.Rybakina, M.-L.Karle – Iu.Pýtintseva jáne juptyq synda Iaroslava Shvedova men Anna Danilina – N.Podoroska men M.-L.Karle kezdesýleri josparlanǵan.
Úsh jeńiske jetken komanda Billi Djin King kýbogynyń sheshýshi irikteý kezeńine joldama alady.
Eske sala keteiik, budan buryn Qazaqstan – Argentina matchynyń jerebesi tartylǵanyn jazǵan bolatynbyz.
