Qazaqstannyń birinshi, álemniń 25-raketkasy Elena Rybakina Sankt-Peterbýrg WTA týrnirin jeńispen bastady, dep habarlaidy "Ult aqparat".
Qazaqstandyq tennisshi alǵashqy ainalymda reitingte 59-orynda turǵan chehiialyq Katerina Siniakovamen kezdesti.
Birinshi partiiada E.Rybakina qos birdei breikpen alǵa shyqty – 4:0. Budan keiin qarsylasy breik jasaǵanymen, qazaqstandyq sportshy óz múmkindigin jibergen joq – 6:3.
Ekinshi sette Elena esep 3:4 bolǵan mezette Siniakovanyń breik jasaýyna jol bergen joq. Sosyn ózi breikpen alǵa ketti – 5:4. Aqyry matchqa dop bergende, qatelesken joq – 6:4.
Báseke 1 saǵat 18 minýtqa sozyldy.
E.Rybakina shirek finalǵa shyǵý úshin álemniń 41-raketkasy, latviialyq Anastasiia Sevastova nemese 46-satydaǵy frantsiialyq Karolin Garsiianyń bireýimen talasady.
Taǵy bir qazaqstandyq, álemniń 34-raketkasy Iýliia Pýtintseva osy jarysta bastapqy matchyn reitingge ózinen tórt saty tómen turǵan reseilik Veronika Kýdermetovamen ótkizedi.
Júlde qory 848 myń AQSh dollaryna baǵalanǵan Sankt-Peterbýrg dodasy 16 aqpanda márege jetedi. Ótken jylǵy jarysta Niderlandy ókili Kiki Bertens finalda horvatiialyq Donna Vekichti utyp, jeńimpaz atanǵan bolatyn. Ol týrnirdiń ekinshi raketkasy retinde biyl da qatysýda.
Eske sala keteiik, budan buryn A.Býblik pen M.Kýkýshkinniń Rotterdam týrnirinde oinaitynyn jazǵan bolatynbyz.
A.Býblik alǵashqy ainalymda frantsiialyq Gregýar Barrermen sheberlik baiqasady. M.Kýkýshkin de G.Barrerdiń otandasy Jil Simonmen kortqa shyǵady.
