Qazaqstandyq Elena Rybakina Qytaidaǵy Shenchjen WTA týrniriniń finalynda jeńilip qaldy, dep habarlaidy "Ult aqparat".
E.Rybakina finalda reseilik Ekaterina Aleksandrovamen sheberlik baiqasty.
E.Aleksandrova álemdik reitingte 34-orynda bolsa, qazaqstandyq tennisshi 36-satyda edi. Aldaǵy dúisenbide ekeýi de óz elderiniń birinshi raketkasy atanady.
Birinshi partiiada reseilik sportshy 4:0 esebimen alǵa ketti. Budan keiin Elena esepti qysqarta aldy – 2:4. Biraq E.Aleksandrova ese jibermedi – 6:2.
Ekinshi sette E.Rybakina 4:2 esebimen alǵa shyqqanymen, sol múmkindigin paidalana almady. Qatarynan tórt geimdi alǵan E.Aleksandrova jeńiske jetti – 6:4.
Báseke 1 saǵat 14 minýtqa sozyldy.
Bul reseilik tennisshiniń WTA týrnirlerindegi alǵashqy jeńisi edi. Al E.Rybakina ótken jyly Býhareste úzdik shyqqan bolatyn.
Qazaqstandyq tennisshi aldaǵy aptada Hobart (Aýstraliia) WTA jarysyna qatysady. Demek, aldaǵy dúisenbide úzdik otyz tennisshiniń qataryna kiretin E.Rybakinanyń óz reitingisin jaqsartatyndai múmkindigi mol.
Eske sala keteiik, budan buryn Elena Rybakinanyń Qytaidaǵy týrnirdiń finalyna shyqqanyn, al Iýliia Pýtintsevanyń Adelaida jarysyn jeńispen bastaǵanyn jazǵan bolatynbyz.
