Búgin Parijde Rolan Garros týrniri bastalady, dep habarlaidy "Ult aqparat".
Eki aptaǵa sozylyp, 13 maýsymda márege jetetin Frantsiia ashyq chempionatynda Qazaqstannan bes tennisshi óner kórsetedi.
Áielder arasynda Qazaqstannyń birinshi, álemniń 22-inshi, osy «Úlken dýlyǵa» jarysynyń 21-raketkasy Elena Rybakina búgin týrnirge arnaiy shaqyrtý alǵan, reitingte 493-oryndaǵy frantsiialyq Elza Jakmomen kortqa shyǵady.
Erteń reitingte 43-satydaǵy Iýliia Pýtintseva álemniń 26-ynshy, osy dodanyń 25-raketkasy bolyp tirkelgen Týnis ókili Ons Jabermen kúsh synasady. Al reitingte 93-oryndaǵy Zarina Diiastyń qarsylasy – álemniń 71-raketkasy, ulybritaniialyq Hizer Ýotson.
Ótken jyly pandemiiaǵa bailanysty keiinge shegerilip, kúzde ótkizilgen Rolan Garros jarysynda E.Rybakina ekinshi ainalymda frantsiialyq Fiona Ferro, Iu.Pýtintseva argentinalyq N.Podoroskaǵa ese jibergen edi. Al Z.Diias alǵashqy ainalymda O.Jaberden asa almaǵan bolatyn.
Erler arasyndaǵy osy synda reitingte 105-orynda turǵan qazaqstandyq Mihail Kýkýshkin búgin álemniń 46-raketkasy, ispaniialyq Alehandro Davidovich-Fokinamen sheberlik baiqasady.
Qazaqstannyń birinshi, álemniń 37-raketkasy Aleksandr Býblik 31 mamyr kúni jarys jolyna shyǵady. Onyń qarsylasy – álemniń 2-raketkasy, reseilik Daniil Medvedev.
Ótken jyly Frantsiia ashyq chempionatynda A.Býblik bastapqy kezdesýinde kort iesi Gael Monfisti utyp, sensatsiia jasaǵanymen, ekinshi ainalymda italiialyq Lorentso Sonegodan jeńilip qaldy.
M.Kýkýshkin de italiialyq Fabio Foninidi tize búktirgenimen, ispaniialyq Pedro Martines-Porteroǵa ese jibergen bolatyn.
Biyl qazaqstandyqtar sátti óner kórsetse, kóbirek tabys taýyp, reitingte de joǵarylaidy.
