بٷگٸن پاريجدە رولان گارروس تۋرنيرٸ باستالادى, دەپ حابارلايدى "ۇلت اقپارات".
ەكٸ اپتاعا سوزىلىپ, 13 ماۋسىمدا مەرەگە جەتەتٸن فرانتسييا اشىق چەمپيوناتىندا قازاقستاننان بەس تەننيسشٸ ٶنەر كٶرسەتەدٸ.
ەيەلدەر اراسىندا قازاقستاننىڭ بٸرٸنشٸ, ەلەمنٸڭ 22-ٸنشٸ, وسى «ٷلكەن دۋلىعا» جارىسىنىڭ 21-راكەتكاسى ەلەنا رىباكينا بٷگٸن تۋرنيرگە ارنايى شاقىرتۋ العان, رەيتينگتە 493-ورىنداعى فرانتسييالىق ەلزا جاكمومەن كورتقا شىعادى.
ەرتەڭ رەيتينگتە 43-ساتىداعى يۋلييا پۋتينتسەۆا ەلەمنٸڭ 26-ىنشى, وسى دودانىڭ 25-راكەتكاسى بولىپ تٸركەلگەن تۋنيس ٶكٸلٸ ونس جابەرمەن كٷش سىناسادى. ال رەيتينگتە 93-ورىنداعى زارينا ديياستىڭ قارسىلاسى – ەلەمنٸڭ 71-راكەتكاسى, ۇلىبريتانييالىق حيزەر ۋوتسون.
ٶتكەن جىلى پاندەميياعا بايلانىستى كەيٸنگە شەگەرٸلٸپ, كٷزدە ٶتكٸزٸلگەن رولان گارروس جارىسىندا ە.رىباكينا ەكٸنشٸ اينالىمدا فرانتسييالىق فيونا فەررو, يۋ.پۋتينتسەۆا ارگەنتينالىق ن.پودوروسكاعا ەسە جٸبەرگەن ەدٸ. ال ز.ديياس العاشقى اينالىمدا و.جابەردەن اسا الماعان بولاتىن.
ەرلەر اراسىنداعى وسى سىندا رەيتينگتە 105-ورىندا تۇرعان قازاقستاندىق ميحايل كۋكۋشكين بٷگٸن ەلەمنٸڭ 46-راكەتكاسى, يسپانييالىق الەحاندرو داۆيدوۆيچ-فوكينامەن شەبەرلٸك بايقاسادى.
قازاقستاننىڭ بٸرٸنشٸ, ەلەمنٸڭ 37-راكەتكاسى الەكساندر بۋبليك 31 مامىر كٷنٸ جارىس جولىنا شىعادى. ونىڭ قارسىلاسى – ەلەمنٸڭ 2-راكەتكاسى, رەسەيلٸك دانييل مەدۆەدەۆ.
ٶتكەن جىلى فرانتسييا اشىق چەمپيوناتىندا ا.بۋبليك باستاپقى كەزدەسۋٸندە كورت يەسٸ گاەل مونفيستٸ ۇتىپ, سەنساتسييا جاساعانىمەن, ەكٸنشٸ اينالىمدا يتالييالىق لورەنتسو سونەگودان جەڭٸلٸپ قالدى.
م.كۋكۋشكين دە يتالييالىق فابيو فونينيدٸ تٸزە بٷكتٸرگەنٸمەن, يسپانييالىق پەدرو مارتينەس-پورتەروعا ەسە جٸبەرگەن بولاتىن.
بيىل قازاقستاندىقتار سەتتٸ ٶنەر كٶرسەتسە, كٶبٸرەك تابىس تاۋىپ, رەيتينگتە دە جوعارىلايدى.
