Qazaqstan qyzdar quramasy «Dáýlet» tennis ortalyǵynda 12 jasqa deiingiler arasynda márege jetken Aziia komandalyq birinshiliginiń (ITF Asian 12&Under Team Championships 2021) chempiony atandy, dep habarlaidy QazAqparat.
Qazaqstan tennis federatsiiasy málim etkenindei, Mádina Rahimniń shákirtteri finalda Úndistan quramasyn 2:0 esebimen utty.
Aldymen Evelina Balaganskaia kortqa shyqty. Birinshi partiiada qarsylasyna 2:6 esebimen ese jibergenimen, sodan keiin jinala bildi – 6:2, 7:5.
Ekinshi kezdesýde Eva Korysheva matchty qarqyndy bastap, birinshi sette esepti 4:0-ge jetkizdi. Kelesi geimde qarsylasy básekeni jalǵastyrýdan bas tartty.
Qazaqstan quramasynyń kapitany Mádina Rahim shákirtteriniń jeńis úshin bar kúshterin jumsaǵanyn jetkizdi.
Ókinishke qarai, qazaqstandyq uldar finalda Pákstan komandasynan jeńilip qaldy. Sheshýshi básekede juptyq synda Madiiar Taǵybekov pen Iaroslav Pshenichnyi sýper tai-breikte utyldy – 4:6, 7:6 (7:5), 10:12.
