Tennisten Qazaqstan áielder quramasy alǵash ret Billi Djin King kýbogynyń finaldyq kezeńine shyqty, dep habarlaidy "Ult aqparat".
Búgin Qazaqstan men Germaniianyń birinshi raketkalary Elena Rybakina men Anjelika Kerber óz eliniń namysy úshin synǵa tústi. Bul olardyń ózara alǵashqy kezdesýi edi.
«Úlken dýlyǵa» týrniriniń úsh dúrkin chempiony, álemniń burynǵy birinshi, qazirgi 17-raketkasy, 34 jastaǵy Kerberdiń tájiribesi mol ekendigi belgili. Odan reitingte eki saty tómen turǵan Rybakinanyń jasy 22-de ǵana.
Birinshi partiia barysynda jetinshi geimde germaniialyq tennisshi breik jasap ketti – 4:3. Sosyn osy basymdylyǵynan aiyrylǵan joq – 6:4.
Ekinshi sette Kerberdiń qateliginen keiin Rybakina alǵa shyqty – 2:0. Partiiany da óz paidasyna sheshti – 6:3.
Úshinshi, sheshýshi setti qazaqstandyq tennisshi breikpen bastaǵanymen, qarsylasy sol boida teńestirip úlgerdi – 1:1. Taǵy da breik almasý – 3:3. Budan keiin Kerber matchqa dop bergende, Rybakina qaiyra breik jasady – 4:5. Sodan keiin qarqynyn báseńdetken joq – 7:5.
Tartysty ótken báseke eki saǵattan astam ýaqytqa sozyldy. Osylaisha Qazaqstan esepti 3:0-ge jetkizip, Billi Djin King kýbogynyń (komandalyq álem chempionaty) finaldyq kezeńine joldama aldy.
