Ispaniianyń Kordova qalasynda Billi Djin King kýbogynyń plei-off kezeńinde Qazaqstan – Argentina matchynyń ekinshi oiyny ótti, dep habarlaidy "Ult aqparat".
Kortqa bul joly Qazaqstannyń birinshi, álemniń 23-raketkasy Elena Rybakina argentinalyq, dúniejúzilik reitingte nebári 430-orynda turǵan Mariia Lýrdes Karlemen shyqty.
Bul kezdesýde qazaqstandyq tennisshi sózsiz favorit sanalǵanymen, oiyn basqasha órbidi.
Birinshi partiiada aldymen E.Rybakina breikpen alǵa shyqty – 2:0. Alaida qarsylasy tarazy basyn teńestirip qana qoimai, esep 3:3 bolǵan mezette breik jasap ketti. Sosyn basymdylyqty ýysynan shyǵarǵan joq – 6:4.
Ekinshi sette Elena qos breikke qol jetkizip, esepti 4:0-ge jetkizdi. Budan keiin argentinalyq tennisshi qarymta qaiyryp, esepti qysqartty – 3:4. Degenmen Rybakina taǵy bir breikten keiin setke dop bergende, óz múmkindigin paidalana bildi – 6:3.
Úshinshi, sheshýshi partiiada kort iesi 3:0 esebimen alǵa ketti. Kún ystyq bolǵan soń ba, ózin jaisyz sezingen Rybakina meditsinalyq kómekke de júgindi. Al argentinalyq sportshy qarqynyn báseńdetken joq – 6:0.
Báseke 2 saǵat 17 minýtqa sozyldy.
Osylaisha Qazaqstan – Argentina matchynda esep teńesti – 1:1. Senbi kúni match jalǵasyp, Billi Djin King kýbogynyń (burynǵy Federatsiia kýbogy) sheshýshi irikteý kezeńine beriletin joldama taǵdyry sheshiledi.
Eske sala keteiik, budan buryn Qazaqstan – Argentina matchynyń jerebesi tartylǵanyn, Iu.Pýtintsevanyń jeńispen bastaǵanyn jazǵan bolatynbyz.
