Qazaqstannyń birinshi, álemniń 17-raketkasy Elena Rybakina US Open týrniriniń úshinshi ainalymyna shyǵa almady, dep habarlaidy "Ult aqparat".
Júlde qory 53,4 mln AQSh dollaryna baǵalanǵan «Úlken dýlyǵa» jarysynyń 11-raketkasy bolyp tirkelgen E.Rybakina ekinshi ainalymda reitingte 93-orynda turǵan amerikalyq Shelbi Rodjerspen kortqa shyqty.
Qazaqstandyq tennisshi biyl 21-ge tolsa, tájiribeli qarsylasy 27-de edi.
Birinshi partiiada birden jinaqy oinaǵan amerikalyq sportshy breikpen alǵa ketti. Degenmen esep 3:5 bolǵan mezette Elena qaiyra breik jasap, óz geimin de jibermedi – 5:5. Biraq qarsylasy setti taǵy bir breikpen túiindedi – 7:5.
Ekinshi sette esep 2:1 bolǵanda Sh.Rodjers breik jasap ketti – 3:1. Taǵy bir breik – 5:1. Aqyry ol on minýttan astam ýaqytqa sozylǵan sońǵy tartysty geimde altynshy matchbolyn paidalana aldy – 6:1.
Báseke 1 saǵat 28 minýtqa sozyldy.
Sh.Rodjers úshinshi ainalymda álemniń 25-raketkasy, ýkrainalyq Daiana Iastremskaia nemese reitingte 84-satydaǵy amerikalyq Medison Brengldiń bireýimen kezdesedi.
