Qazaqstannyń birinshi, álemniń 25-raketkasy Elena Rybakina Sankt-Peterbýrg WTA týrniriniń jartylai finalyna shyqty, dep habarlaidy "Ult aqparat".
Osy jarystyń 8-raketkasy bolyp tirkelgen E.Rybakina shirek finalda dúniejúzilik reitingte 159-orynda turǵan frantsiialyq Osean Dodenmen kezdesti.
O.Doden negizgi týrnirge irikteý saiystarynan keiin qosylǵan-dy.
Birinshi partiiada qazaqstandyq tennisshi 5:2 esebimen alǵa shyqty. Budan keiin onyń setti bitiretindei múmkindigi bolǵanymen, ony paidalana almai, qarsylasynyń breik jasap, tarazy basyn teńestirýine múmkindik berip qoidy. E.Rybakina partiia barysynda tórt birdei seit-bolyn múlt jiberse, O.Doden tai-breikte birden júzege asyrdy – 7:6 (7:5).
Ekinshi sette O.Doden breikpen alǵa ketti – 3:1. Degenmen E.Rybakina da qaiyra breik jasai bilip, óz geimin aldy – 3:3. Esep 5:4 bolyp, Rybakina dop bergende, frantsiialyq tennisshi qos birdei matchbolyn paidalana almady. Sodan soń qazaqstandyq sportshy breikpen alǵa shyǵyp, bul joly setti jeńispen támamdady – 7:5.
Úshinshi, sheshýshi partiiany Elena breikpen bastady – 1:0. Taǵy bir breik – 3:0. Sodan keiin qarsylasynyń qaiyra breik jasaýyna múmkindik bermei, esepti 5:1-ge jetkizdi. Aqyry matchqa dop bergende, qatelesken joq – 6:2.
Eki saǵat 26 minýtqa sozylǵan tartysty básekede qazaqstandyq tennisshi 15 eis jasady.
E.Rybakina júlde qory 848 myń AQSh dollaryna baǵalanǵan jarystyń finalyna shyǵý úshin álemniń 5-inshi, osy dodanyń 1-raketkasy, shveitsariialyq Belinda Benchich nemese reitingte 21-satyda turǵan grekiialyq Mariia Sakkaridiń bireýimen talasady.
E.Rybakina Sankt-Peterbýrg týrniriniń alǵash ret jartylai finalyna shyqty. Ol 2018 jyly 18 jasynda shirek finalǵa deiin jetken bolatyn.
Eske sala keteiik, budan buryn Aleksandr Býbliktiń Rotterdam týrniriniń shirek finalyna shyǵa almaǵanyn, Qazaqstan áielder quramasyna Iaroslava Shvedovanyń basshylyq etetinin jazǵan bolatynbyz.
