قازاقستاننىڭ بٸرٸنشٸ, ەلەمنٸڭ 25-راكەتكاسى ەلەنا رىباكينا سانكت-پەتەربۋرگ WTA تۋرنيرٸنٸڭ جارتىلاي فينالىنا شىقتى, دەپ حابارلايدى "ۇلت اقپارات".
وسى جارىستىڭ 8-راكەتكاسى بولىپ تٸركەلگەن ە.رىباكينا شيرەك فينالدا دٷنيەجٷزٸلٸك رەيتينگتە 159-ورىندا تۇرعان فرانتسييالىق وسەان دودەنمەن كەزدەستٸ.
و.دودەن نەگٸزگٸ تۋرنيرگە ٸرٸكتەۋ سايىستارىنان كەيٸن قوسىلعان-دى.
بٸرٸنشٸ پارتييادا قازاقستاندىق تەننيسشٸ 5:2 ەسەبٸمەن العا شىقتى. بۇدان كەيٸن ونىڭ سەتتٸ بٸتٸرەتٸندەي مٷمكٸندٸگٸ بولعانىمەن, ونى پايدالانا الماي, قارسىلاسىنىڭ برەيك جاساپ, تارازى باسىن تەڭەستٸرۋٸنە مٷمكٸندٸك بەرٸپ قويدى. ە.رىباكينا پارتييا بارىسىندا تٶرت بٸردەي سەيت-بولىن مٷلت جٸبەرسە, و.دودەن تاي-برەيكتە بٸردەن جٷزەگە اسىردى – 7:6 (7:5).
ەكٸنشٸ سەتتە و.دودەن برەيكپەن العا كەتتٸ – 3:1. دەگەنمەن ە.رىباكينا دا قايىرا برەيك جاساي بٸلٸپ, ٶز گەيمٸن الدى – 3:3. ەسەپ 5:4 بولىپ, رىباكينا دوپ بەرگەندە, فرانتسييالىق تەننيسشٸ قوس بٸردەي ماتچبولىن پايدالانا المادى. سودان سوڭ قازاقستاندىق سپورتشى برەيكپەن العا شىعىپ, بۇل جولى سەتتٸ جەڭٸسپەن تەمامدادى – 7:5.
ٷشٸنشٸ, شەشۋشٸ پارتييانى ەلەنا برەيكپەن باستادى – 1:0. تاعى بٸر برەيك – 3:0. سودان كەيٸن قارسىلاسىنىڭ قايىرا برەيك جاساۋىنا مٷمكٸندٸك بەرمەي, ەسەپتٸ 5:1-گە جەتكٸزدٸ. اقىرى ماتچقا دوپ بەرگەندە, قاتەلەسكەن جوق – 6:2.
ەكٸ ساعات 26 مينۋتقا سوزىلعان تارتىستى بەسەكەدە قازاقستاندىق تەننيسشٸ 15 ەيس جاسادى.
ە.رىباكينا جٷلدە قورى 848 مىڭ اقش دوللارىنا باعالانعان جارىستىڭ فينالىنا شىعۋ ٷشٸن ەلەمنٸڭ 5-ٸنشٸ, وسى دودانىڭ 1-راكەتكاسى, شۆەيتسارييالىق بەليندا بەنچيچ نەمەسە رەيتينگتە 21-ساتىدا تۇرعان گرەكييالىق مارييا ساككاريدٸڭ بٸرەۋٸمەن تالاسادى.
ە.رىباكينا سانكت-پەتەربۋرگ تۋرنيرٸنٸڭ العاش رەت جارتىلاي فينالىنا شىقتى. ول 2018 جىلى 18 جاسىندا شيرەك فينالعا دەيٸن جەتكەن بولاتىن.
ەسكە سالا كەتەيٸك, بۇدان بۇرىن الەكساندر بۋبليكتٸڭ روتتەردام تۋرنيرٸنٸڭ شيرەك فينالىنا شىعا الماعانىن, قازاقستان ەيەلدەر قۇراماسىنا ياروسلاۆا شۆەدوۆانىڭ باسشىلىق ەتەتٸنٸن جازعان بولاتىنبىز.
